वाशिङटन । संयुक्त राष्ट्र संघका लागि पूर्व अमेरिकी राजदूत निकी हेली र अमेरिकी राष्ट्रपति डोनाल्ड ट्रम्पकी छोरी इभान्का ट्रम्प मध्ये एक जना खाली रहेको विश्व बैंकको अध्यक्ष पदमा नियुक्त हुने तयारी भइरहेको अमेरिकी सञ्चार माध्यमले जनाएका छन् । सो बैंकका अध्यक्ष जीम योङ किमले गएको सोमबार राजीनामा दिएका थिए ।
उनले आउँदो फेब्रुवरी महिनादेखि लागू हुने गरी राजीनामा दिएका हुन् । फाइनान्सीयल टाइम्सले दिएको समाचार अनुसार अहिले दुई महिला सो पदको प्रमुख दावेदारका रुपमा रहेका छन् । राष्टसंघका लागि अमेरिकी राजदूत हेलीले गएको महिना मात्रै जागीर छोडेकी थिइन् । इभान्कापनि सन् २०१७मा महिलाहरुको व्यवसायलाई प्रवद्र्धन गर्ने अभियानलाई लिएर विश्व बैंकसँग जोडिएकी थिइन् । तर, सरकारी अधिकारीहरुले भने अध्यक्ष पदका लागि संभावित थुप्रैको नाम आएपनि अहिले नै यसै भन्न नसकिने जनाएका छन् । ‘‘हामीले आन्तरिक पुनरावलोकनको काम गरिरहेका छौं’’ उनीहरुको कथन रहेको छ ।
अमेरिका विश्व बैंकको ठूलो शेयरहोल्डर भएको नाताले उसले नै यसको अध्यक्ष पदमा नियुक्त गर्ने अलिखित सहमति रहँदै आएको छ । दोस्रो विश्वयुद्धपछि स्थापना भएको यो बैंकको सन् २०१२मा अध्यक्ष चयन गर्दा पनि निकै प्रतिस्पर्धा भएको थियो । विश्व बैंकले आगामी अप्रीलको मध्य सम्ममा नयाँ अध्यक्ष चयन भइसक्ने जनाएको छ ।