काठमाडौं । रातो र कालो कोठे सट । गोरो बाटुलो अनुहार, टाउकोमा नीलो फेटा । पृष्ठभूमीको पर्दामा अनुहार मुजा परेका बुढाबुढीको तस्बिर । पृष्ठभूमीमा रहेका बाद्यबादकले बाँसुरीको धुन बजाउँछन् । मनै चिर्ने बाँसुरीको धुनलाई अरु थुप्रै थरी बाजागाजाले पछ्याउँछन् । अनि हातमा माइक बोकेका एक युवा माइक मुख छेउमा पुर्याउँछन् । उनी आफ्नै कथा सुनाउँछन् । अनि गीत सुरु हुन्छ–बाउको जुँगो...।
ती गीत गाउने युवा अरु कोही नभएर पुस्पन प्रधान हुन्छन् । र मञ्च हुन्छ, नेपाल आइडल सिजन–२ को । त्यसअघि अघिल्लो श्रृंखलामा अमित बरालले गाएको उनको अर्को गीत ‘पंछी...’ ले धेरैलाई छोइसकेको थियो । ‘बाउको जुँगो...’ गाउँदा उनले मञ्चमा सुनाएको कथाले धेरैको मन चोर्यो । उनलाई नेपाली संगीतप्रेमी माझ ‘मार्क’ गरायो ।
त्यो मञ्च पाउनु अगाडि गुमनाम प्रायः तिनै पुस्पनलाई आज भ्याई नभ्याई छ । कहिले देशकै कार्यक्रम त कहिले विदेशका कार्यक्रम । उनलाई फुर्सदै छैन आजकाल । गणीतका शिक्षक उनी विदा बसेर सांगीतिक कार्यक्रममा सहभागी भइरहेका छन् ।
उनको फेसबुक वाल हिजोआज कार्यक्रमको डेट र भेन्यूले भरिन्छ । लामो संगीत साधनाका वावजुद पनि गुमनाम पुस्पनलाई एउटै मञ्चले संसार सामु चिनायो र संसार घुमाउँदैछ ।
अहिले उनी आसाममा छन् । पुसको अन्तिम साता हुने पोखरा महोत्सवका लागि शुक्रबार पोखरा महोत्सवमा आउने तरखरमा रहेका पुस्पन भोलि विहीबार नाइट इष्ट गोरखा फेष्टिबलमा विशेष प्रस्तुती दिँदैछन् ।
केही कार्यक्रमको मिति र स्थान तय भइसकेको छ । केही हुँदैछन् । “सिंगापुर, हङकङ, कोरिया, अष्ट्रेलिया र अमेरिकाका कार्यक्रमका लागि जाँदैछु । दुवई र अन्य केही ठाउँका कार्यक्रममा पनि कुरा भइरहेको छ,” आसामबाट बाह्रखरीसँग पुस्पन भन्छन्, “पोखराबाट सिंगापुर जाने कार्यक्रम छ । त्यसपछि चलचित्र ‘समरलभ’को पब्लिसिटीका लागि काठमाडौंमा केही दिन रहन्छु ।” पुस्पन ‘समर लभ’का संगीतकार हुन् भने उनी आफैंले गीत लेखेर गाएका पनि छन् ।
‘समर लभ’को पब्लिसिटीपछि कोरिया जाने पुस्पन केही दिनका लागि नेपाल फर्किने छन् । त्यसपछि हङकङ जाने उनी अप्रिलमा ८ वटा कार्यक्रमका लागि अष्ट्रेलिया जाने तरखरमा छन् । त्यसपछि दुवई र अमेरिकाको कार्यक्रममा जाने उनी सुनाउँछन् ।
नेपाल आइडलका प्रतिस्पर्धी अमित बरालको गीतका लागि तयारी गरिरहेका पुस्पन आफ्नो गीत पनि चाँडै बजारमा ल्याउने तरखरमा छन् ।
“अमितको गीत करिब एक महिनामा सार्वजनिक गर्ने तयारीमा छौं,” उनले भने, “त्यसपछि मेरा केही गीत आउने छन् । अमित र मैले संयुक्त रुपमा पनि गीत ल्याउने तयारी गरिरहेका छौं ।”
तलकाे न्यूज लिंक पनि पढ्नुस् ः
'कमसेकम मर्ने बेला ती आमाबुबालाई हाम्रो काख दिऊँ !'