इसाईहरूको पर्व क्रिसमसकै दिन अमेरिकी सीमा सुरक्षाकर्मीको हिरासतमा एक जना आठ वर्षीय बालकको मृत्यु भएको छ । यसभन्दा केही दिन पहिले पनि एक सात वर्षीया बालिकाको त्यस्तै परिस्थितिमा ज्यान गएको थियो । यी दुवै बालबालिका दक्षिण अमेरिकाको संकटग्रस्त मुलुक ग्वाटेमालाबाट शरण खोज्दै अमेरिका आइपुगेका थिए । संसारभरका शरणार्थीलाई स्वागत गर्ने परम्परा भएको अमेरिकामा शरणार्थीलाई निषेध गर्ने नीति अपनाइएपछि सीमामा निकै कडाइ गर्न थालिएको छ । यी दुवै बालबालिकालाई अमेरिकी सीमा प्रहरीले उनीहरूका बाबुसँगै हिरासतमा लिएको थियो । बालबालिकालाई हिरासतमा राख्नका लागि आवश्यक सुविधाको अभावमा उनीहरूको मृत्यु भएको मानिएको छ । बालबालिकालाई पनि वयस्कहरूलाई हिरासतमा राख्न बनाइएको शिविरहरूमै राखिएको थियो ।
अमेरिका स्वतन्त्र विश्वको अगुवा र आदर्श थियो । स्वतन्त्रता, न्याय, अवसर र समानताको खोजी गर्नेहरूको पहिलो गन्तव्य हुनेगर्थ्यो । संसारभरबाट अवसरको खोजीमा मात्र हैन जीवन रक्षाका लागि आउनेहरूलाई अमेरिकाले सधैँ स्वागतै गर्थ्यो । यसैले केही वर्ष पहिलेसम्म पनि संयुक्त राज्य अमेरिका सबैको सपनाको संसार मानिन्थ्यो । दुर्भाग्य, सन् २०१६ मा डोनाल्ड ट्रम्प राष्ट्रपति चुनिएलगत्तै अमेरिकी आदर्श र मूल्य मान्यतामा ह्रास आउन थाल्यो । शरणार्थीहरूको देश मानिने अमेरिकालाई ट्रम्पले बन्द मुलुक बनाउन खोजे । अदालतहरूको पटकपटकको आदेशविपरीत शरणार्थीहरूलाई प्रवेश निषेधको आदेश पालना गराउन अमानवीय अभ्यास गर्न पनि अमेरिकी प्रशासन हिचकिचाएन । अमानवीय र अन्तर्राष्ट्रिय मान्यता तथा अमेरिकी मूल्यविपरीत हिरासतमा लिइएका बालबालिकालाई आमाबाबुबाट अलग्याउने अभ्याससमेत ट्रम्प प्रशासनले गरेको थियो ।
अमेरिकी राष्ट्रपति डोनाल्ड ट्रम्प अहिले विवेकहीन व्यक्ति शक्तिमा पुग्दा कति ठूलो क्षति हुन्छ भन्ने उदाहरण हुनपुगेका छन् । आफ्नो सीमाभित्र अर्को देशका नागरिकलाई प्रवेश गर्न दिने वा नदिने अधिकार सम्बन्धित मुलुकलाई होला । तर, प्रवेश गर्न नदिने मुलुकले शरणार्थीलाई अमानवीय व्यवहार भने गर्न हुँदैन । विगतमा अरू देशमा शरणार्थीहरूप्रति अमानवीय व्यवहार भएकोमा अमेरिकाले नै आवाज उठाउँदै आएको थियो । तेस्रो मुलुकमा अलपत्र परेका शरणार्थीलाई उदारतापूर्वक शरण दिने राष्ट्रमा पनि अमेरिका नै अग्रणी रहेको हो । यसैले पनि अमेरिकाले बालबालिकाप्रति समेत अमानवीय व्यवहार गर्दा अमेरिकाभित्र र बाहिर बढी क्षोभ प्रकट भएको हुनुपर्छ । एक्काइसौं शताब्दीमा समेत अमेरिकी सरकारबाट यस्तो क्रूर अमानवीय व्यवहारको अपेक्षा सायद कसैले पनि गरेको थिएन । ट्रम्प प्रशासनले कम्तीमा पनि बालबालिकाप्रति क्रूरतापूर्ण व्यवहार नगरोस् । अमानवीय व्यवहार गरेकोमा स्वतन्तत्रताकी देवीको भूमि अमेरिकाको फेरि निन्दा गर्नु नपरोस् !