काठमाडौं । नेप्से परिसूचक बुधबार पनि घटेको छ । एकसाता बढेर मंगलबार घटेको सेयर बजारले आजपनि अघिल्लै दिनको लय समातेको हो ।
बुधबार सेयर बजार परिसूचक ५ दशमलव ४६ अंकले घटेर ११ सय ६२ दशमलव ७ अंकमा कायम भएको छ । कारोबार सुरु भएको एक घन्टा घटेर दोस्रो घन्टामै ११ सय ७१ अंकमा पुगेको सेयर बजार त्यसयता भने निरन्तर ओरालो लागेको हो ।
नेप्से घट्दा बुधबार सेन्सिटिभ इन्डेक्स १ दशमलव २६ अंकले घटेर २ सय ४७ दशमलव ३३ अंकमा कायम भएको छ भने कारोबार रकममा पनि गिरावट आएको छ । अघिल्लो दिन आधा अर्बभन्दा बढीको कारोबार भएको सेयर बजारमा यसदिन ३८ करोड ७२ लाख रुपैयाँको मात्र कारोबार भएके छ । यसक्रममा १ सय ५८ कम्पनीका १३ लाख २ हजार कित्ता सेयर किनबेच भए । तीमध्ये सबैभन्दा बढी नेपाल लाइफ इन्स्योरेन्स कम्पनीको ३ करोड ५२ लाख रुपैयाँ बराबरको सेयर कारोबार भएको छ ।
सेयर बजारको यो गतिविधिले बजारमा अल्पकालमा प्रफिट बुक गर्ने लगानीकर्ता हावी भएको देखिएको जानकारहरुले बताएका छन् । यसो त, बजार परिसूचकमा वृद्धि ल्याउने केही कारण हाल सकारात्मक छन् । दीर्घकालीन सुधारका लागि भने नीतिगत व्यवस्था, बैंक ब्याजदर लगायत विषयका लागि लगानीकर्ता अनसनमा रहेको अवस्थामा अर्थ मन्त्रालयद्वारा गठित समितिले पनि अर्थतन्त्र सुधारको प्रतिवेदन तयार पारेको छ ।
यी विषयले बजारमा प्रभाव पर्ने जानकार बताउँछन् । केही दिनयता निरन्तर बढेर मंगलबार उच्च कारोबारसहित परिसूचक घटेकोमा बुधबार भने कारोबार घटि परिसूचक घट्नुले अल्पकालीन लगानीकर्ता हावी हुन थालेको लगानीकर्ताको दावी छ ।
नेप्से घट्दा समूहगत परिसूचक मिश्रित देखिएका छन् । यसदिन कारोबारमा आएका १० समूहमध्ये चार समूह बढेका छन् । घट्नेमा सबैभन्दा बढी बीमा समूहको उपसूचक ३६ दशमलव ५६ अंकले घटेको छ ।