एजेन्सी । घरेलु मैदानमा आजबाट विश्व क्लब च्याम्पियनसिप सुरु हुँदा संयुक्त अरब इमिरेट्स (युएई) को च्याम्पियन अल अइनसामु कम्तिमा गतवर्ष घरेलु फुटबलको प्रतिद्वन्द्वी अल जजिराले जत्तिको उपलब्धि हासिल गर्नुपर्ने चुनौती हुनेछ । गतवर्ष क्वार्टरफाइनलमा जजिराले एसियाली च्याम्पियन उरावा रेड डायमण्डसलाई स्तब्ध पारेको थियो । अन्तिम चारको खेलमा भने टोली युरोपेली महारथी रियाल मड्रिडसँग पराजित भएको थियो । 
फाइनल पुग्न नसके पनि जजिराले जस्तो सेमिफाइनल पुग्नैपर्ने मानसिक दबाबमा रहेको अल अइनले प्रतियोगिताको उद्घाटन खेलमा आज राति ओसियाना च्याम्पियन वेलिङटनसँग प्रतिस्पर्धा गर्नेछ । कागजमा वेलिङटन प्रतियोगिताको सबैभन्दा कमजोर टोली हो । तर फिफा क्लब विश्व च्याम्पियनसिपमा स्तब्धतापूर्ण नतिजाहरु सामान्य हुने भएकाले अफ्रिकी च्याम्पियन इस्पेरेन्स डी ट्युनिसविरुद्ध आगामी चरणको सम्भावित भिडन्तका लागि अल अइनलाई स्थान पक्का गर्नु सहज हुने छैन । 
अल अइनका पूर्व प्रशिक्षक ज्लाट्को डालिचले रुसमा सम्पन्न विश्वकपमा क्रोएसियालाई फाइनलसम्म पुर्याएर चर्चा बटुलेको वर्ष उनकै देशका जोरान मामिचले पनि युएईमा सफलताको भरपुर स्वाद चाखिरहेका छन् । अल अइनमा प्रशिक्षकको रुपमा पहिलो सिजन बिताउने क्रममा उनले टोलीलाई इतिहासमै पहिलो पटक युएई व्यावसायिक लिगको साथै प्रेसिडेन्ट्स कपको उपाधि जिताएका थिए । पानाथिनाइकोसबाट स्विडिस अन्तर्राष्ट्रिय स्ट्राइकर मार्कुस बर्गलाई भित्र्याउनु अइनको सफलताको मुख्य रहस्यमध्ये एक थियो । बर्गले लिगमा २५ गोल गर्नुका साथै प्रेसिडेन्ट्स कपमा तीन गोल गरेका थिए । त्यसमा अल वासलविरुद्धको फाइनलको विजयी गोल पनि समावेश छ । 
बर्गको उच्च स्कोरिङ फर्मले यो सिजनमा पनि निरन्तरता पाइरहेको छ । जारी सिजनका १२ लिग खेलमा उनले १० गोल गरिसकेका छन् । विपक्षी पोष्टमा एकरुपको उच्च प्रदर्शन गरिरहेका बर्ग क्लब विश्वकपमा पनि वेलिङटनका रक्षकहरुका लागि सबैभन्दा ठूलो चुनौती बन्नेछन् । २०१६ का एएफसी वर्ष खेलाडी ओमार अब्दुलरहमाान कीर्तिमानी मूल्यमा साउदी अरेबियाको महारथी अल हिलाल गए पनि अल अइनले अपेक्षा गरेअनुसार उनको अभाव भोग्नु परेको छैन । दी बोस उपनाम रहेको ब्लक अहिले युएई प्रो लिगमा दोस्रो स्थानमा छ । आश्चर्यजनक रुपमा शीर्ष स्थानमा कव्जा जमाउन सफल सारजहाँसँग अंक बराबर भए पनि अइन गोलअन्तरमा दोस्रो स्थानमा सिमित भएको हो । 
घरेलु लिगमा राम्रो गरिरहे पनि क्लब विश्वकपका लागि टोलीको तयारी त्यति सन्तोषजनक देखिएको छैन । प्रेसिडेन्ट्स कपको उपाधि रक्षा अभियान पहिलो चरणमै असफल हुने क्रममा टोलीले पछिल्लो खेलमा अल वासलसँग ५–३ को पराजय भोगेको थियो । २०१८ को एएफसी च्याम्पियन्स लिगमा पनि रक्षात्मक कमजोरीको टोलीले मूल्य चुकाउनु परेको थियो । कतारी प्रतिद्वन्द्वी अल डुहाइलविरुद्ध दुई लेगको खेलमा ८–३ को समग्र अन्तरमा पराजित हुँदा टोली अन्तिम १६ बाटै बाहिरिएको थियो । टोलीले अल जजिराको उपलब्धिलाई निरन्तरतामात्र दिने हो भने पनि त्यस्ता कमजोरीमा सुधार गर्न सक्नुपर्नेछ । 
फिफा क्लब विश्वकपमा अल अइन र ओसियाना च्याम्पियन वेलिङटन दुवैको यो पहिलो सहभागिता हो । ओसियाना च्याम्पियनसिप तथा २००५ मा प्रतियोगिता सुरु भएदेखि नै क्लब विश्वकप सहभागितामा न्युजिल्यान्डकै अर्को टोली अकल्यान्ड सिटीको दबदबा थियो । प्रतियोगिताका १३ संस्करणमध्ये अकल्यान्डलेमात्र ९ पटक सहभागिता जनाएको छ । त्यसक्रममा अकल्यान्डले मध्यपूर्वको प्रतिद्वन्द्वी अल आहली लाई २००९मा २–० ले हराएको थियो । २०१४ मा पण्डितहरुका सबै अनुमान गलत साबित गर्दै टोली क्लब विश्वकपमा तेस्रो स्थान हासिल गर्न सफल भएको थियो । त्यसक्रममा टोलीले अफ्रिकी च्याम्पियन इएस सेटिफ र कन्काकाफको च्याम्पियन्स लिग विजेता क्रुज अजुललाई पराजित गरेको थियो । 
यसपाली ओसियानाबाट क्लब विश्वकपमा सहभागिता जनाउनेमा अकल्यान्डको दबदबा तोड्दै फरक प्रतिनिधि युएई पुगेको छ । २०१० मा पनि अकल्यान्ड असफल हुँदा पपुवा न्युगिनीको हेकारी युनाइटेडले क्लब विश्वकपमा ओसियानाको प्रतिनिधित्व गरेको थियो । 
ओएफसी च्याम्पियन्स लिगको फाइनलमा प्रभावशाली प्रदर्शनका साथ वेलिङटनले युएई भ्रमणको टिकट काटेको थियो । घरेलु मैदानमा सम्पन्न फाइनलको पहिलो लेगमा टहिटीको लाउटोकामाथि ६–० को एकतर्फी जित निकालेको टोलीले दोस्रो लेग ४–३ ले पक्षमा पारेको थियो । 
न्युजिल्यान्डका स्ट्राइकर एन्गुस किलकोली ओसियाना च्याम्पियन्स लिगमा ८ गोलसहित उच्च गोलकर्ता बनेका थिए । सेमिफाइनलमा प्राप्त पेनाल्टीमा उनैले गरेको गोलमा वेलिङटन अवे गोल नियमअनुसार अकल्यान्डलाई पछि पार्दै फाइनल पुगेको थियो । 
प्रतियोगितामा पहिलो पटक सहभागिता जनाउने तयारीमा रहेका दुवै टोलीले जितका साथ क्लब विश्वकप यात्रा अघि बढाउने उदेश्य राख्दा स्ट्राइकरलाई मुख्य हतियारका रुपमा प्रस्तुत गर्नेछन् ।