पेरिस । फ्रान्सको स्ट्रासबर्गमा रहेको क्रिसमस मार्केटमा स्थानीय समय अनुसार मंगलबार साँझ गोली प्रहार हुँदा कम्तिमा ४ जनाको मृत्यु हुनुका साथै ८ जना घाइते भएका छन् ।
प्रहरीलाई उद्धृत गर्दै एशोसिएट प्रेसले जनाएअनुसार २९ वर्षीय एक फ्रान्सेली उक्त गोली काण्डका लागि शंकाको घेरामा रहेका छन् । फ्रान्सको पूर्वी भागमा पर्ने सो क्रिसमस मार्केट ठूलो बजार क्षेत्र हो । उक्त गोली काण्डपछि सो बजार र युरोपेली संसद भवन समेत बन्द गरिएको थियो । फ्रान्सको अभियोजकको कार्यालयले घटनाको बारेमा छानबिन भइरहेको जनाएको छ । सो घटना मंगलबार साँझ करिब ८ बजे भएको थियो ।
विगतमा पनि क्रिसमसको आसपासमा युरोपेली राष्ट्रहरुमा आतंकवादी हमला हुने गरेका थिए । मंगलबारको घटना कुन नियतबाट भएको हो भन्ने बारेमा खुलिनसकेको अधिकारीहरुले बताएका छन् ।
(एजेन्सी)