काठमाडौं । प्रमुख प्रतिपक्षी दल नेपाली कांग्रेसको आसन्न महासमिति बैठक निर्धारित मितिमै सम्पन्न हुनेमा आशंका उत्पन्न भएको छ । भ्रातृ संगठन नेविसंघमा उमेर हद लागु गर्न संस्थापन पक्षले बहुमतको आड लिएपछि चुलिएको विवादका कारण महासमिति बैठक निर्धारित मितिमै सम्पन्न हुनेमा आशंका उत्पन्न भएको हो । 

केन्द्रीय विधान संशोधन मस्यौदा समितिले तयार पारेको विधान मस्यौदामाथि चाडपर्वमा नअल्मलिइ छलफल चलाइएमात्रै तोकिएको मितिमा महासमिति बैठक सम्पन्न हुने कांग्रेस नेताहरुको भनाइ छ । ‘‘चियापानभन्दा अगाडि विधानको मस्यौदा तयार हुन्छ । तिहारको विदामा पनि केन्द्रीय कार्यसमितिले विधानको मस्यौदामाथि काम गर्नुपर्छ अनि मात्रै तोकिएकै मितिमा महासमिति बैठक सम्भव छ । नत्र पछाडि धकेलिन्छ,’’ विधान संशोधन मस्यौदा समितिका सदस्य प्रदीप पौडेलले बाह्रखरीसँग भने ।   

तर, नेता पौडेलले भने झै आन्तरिक विवादका कारण कांग्रेसले विधानको मस्यौदालाई तिहारको समयमा केन्द्रीय कार्यसमिति बैठकमा छलफलका लागि लैजाने सम्भावना न्यून छ । भ्रातृ संगठन नेविसंघमा उमेर हद लागु गर्ने निर्णय फिर्ता नलिएसम्म बैठक बहिष्कार गर्ने संस्थापन इतर समूहको चेतावनीका कारण केन्द्रीय कार्यसमिति बैठक बस्ने मिति तय हुन नसकेको स्रोतको भनाइ छ । 

यद्यपि संस्थापन इतर समूहमै रहेका केन्द्रीय विधान संशोधन मस्यौदा समितिका सदस्य पौडेल नेविसंघको विवादका कारण देखाएर केन्द्रीय कार्यसमिति बैठक रोक्न नहुने पक्षमा देखिन्छन् । ‘‘नेविसंघमा देखिएको विवाद आफ्नो ठाउँमा छ । नेविसंघको विवादले केन्द्रीय समितिको बैठक नबस्ने, विधानमा छलफल नहुने भन्ने हुँदैन । निर्धारित मितिमै महासमिति बैठक सम्पन्न गर्न केन्द्रीय समिति बैठक बसेर विधानको मस्यौदामाथि छलफल गर्नुपर्छ,’’ उनले प्रतिक्रिया दिए ।      

गत असोज २१ गते बसेको केन्द्रीय कार्यसमिति बैठकमा संस्थापन पक्षले नेविसंघमा ३२ वर्षे उमेर हद बहुमतका आधारमा पारित गरेपछि संस्थापन इतर समूह असन्तुष्ट छ । गत असोज २५ गतेका लागि बोलाइएको बैठक अनिश्चितकालका लागि स्थगित गरिएपछि कांग्रेस नेताहरु सामूहिक रुपमा एक ठाउँमा भेला हुन सकेका छैनन् । 

केन्द्रीय समितिको निर्णयमा ‘नोट अफ डिसेन्ट’ लेख्ने वरिष्ठ नेता रामचन्द्र पौडेल, नेता कृष्णप्रसाद सिटौला, प्रकाशमान सिंह र अर्जुननरसिंह केसीले बहिष्कार गर्ने तयारी गरेपछि असोज २५ गतेका लागि बोलाइएको बैठक अनिश्चितकालका लागि स्थगित गरिएको थियो ।
गत भदौ ९ गते सम्पन्न कांग्रेस केन्द्रीय कार्यसमितिकोे बैठकले आगामी मंसिर ५ देखि ९ गतेसम्म काठमाडौँँमा महासमितिको बैठक आयोजना गर्ने निर्णय गरेको थियो । कांग्रेसले महासमिति बैठकको तयारीका लागि तीव्रता भने दिइरहेको छ । सोमबार बसेको स्थानीय व्यवस्थापन समितिको बैठकले महासमिति बैठकको तयारीका लागि विभिन्न उपसमिति गठन गरेको छ । 

बैठकले भक्तपुर कांग्रेसका सचिव उद्धव सिलवालको संयोजकत्वमा भोजन व्यवस्थापन उपसमिति, काठमाडौँ कांगे्रेसका कोषाध्यक्ष गोविन्द पुडासैनीको संयोजकत्वमा मञ्च तथा प्रचारप्रसार व्यवस्थापन उपसमिति र ललितपुर कांग्रेसका सचिव भीमसेन घिमिरेको संयोजकत्वमा स्वयंसेवक व्यवस्थापन उपसमिति गठन गरेको हो । 

बैठकले भक्तपुर कांग्रेसका सचिव निशान ढुङ्गेलको संयोजकत्वमा स्थानीय व्यवस्थापन सचिवालय उपसमिति गठन गरेको कांग्रेस कार्यालयका सचिव डा. प्रदीप पराजुलीले जानकारी दिएका छन् । आर्थिक व्यवस्थापन गर्न उपत्यकाका तीनै जिल्लाका सभापतिलाई जिम्मा दिने निर्णय गरिएको उनले बताए । 

यसअघि गत शनिबार पार्टी सभापति शेरबहादुर देउवाको अध्यक्षतामा बसेको कांग्रेस पदाधिकारी र उपत्यकाका तीनै जिल्ला कार्यसमितिको संयुक्त बैठकले महासमितिको बैठक काठमाडौंको भृकटी मण्डपमा गर्ने निर्णय गरेको थियो ।