काठमाडौं । नेपाली कांग्रेसको विवाद समाधान उन्मुख देखिएको छ । आइतबार सभापति शेरबहादुर देउवाको निवास बूढानीलकण्ठमा बसेको पदाधिकारी बैठक पार्टीमा देखिएका विवादहरु समाधान गरेर अघि बढ्ने सहमति जुटाएको छ ।

केन्द्रीय सदस्यसहित बस्दै आएको पदाधिकारी बैठकले पार्टीमा देखिएका पछिल्ला विवादहरु समाधान गरेर अघि बढ्ने सहमति जुटाएको नेताहरुले बताएका छन् । कांग्रेस सहमहामन्त्री डा. प्रकाशशरण महतले पदाधिकारी बैठक समझदारी उन्मुख देखिएको जानकारी दिए ।

“मन माझा माझ गरेर आशंकालाई निवारण गर्ने काम भएपछि पदाधिकारी बैठक समझदारी उन्मुख भएको छ । अब अनौपचारिक बैठक बस्दैन । २७ गते केन्द्रीय कार्यसमिति बैठकले अब सहमतिमै निर्णयहरु गर्छ । कुरा मिलिसक्यो,” उनले बाह्रखरीसँग भने ।

यस्तै बैठकमा सहभागी पौडल समूहका नेता अर्जुननरसिंह केसीले पनि पदाधिकारी बैठक सहमतितर्फ उन्मुख भएर सकारात्मक उपलब्धिहरु हासिल भएका प्रतिक्रिया दिए ।

“आज सहमति भएन भन्‍ने होइन, केही विषयमा एकदमै सहमतितिर उन्मुख भएर सकारात्मक उपलब्धिहरु भएका छन् । तर, अन्तिम सहमतिको निर्णय भने भइसकेको छैन,” उनले भने, “अन्तिम टुंगो लाग्न भने बाँकी छ । परिस्थिति सहमतितिर उन्मुख छ ।”

विभाग गठन र मनोनयन, क्रियाशील सदस्यता वितरण, संगठन समायोजन, जनसम्पर्क समिति, भ्रातृ संस्थाको पदावधि, भ्रातृ संस्थाको पदाधिकारीको दोहोरो जिम्मेवारीलगायतका विषयमा कांग्रेसमा विवाद थियो । तीमध्ये अधिकांश विवादहरु पार्टीको विधानमा गरिएको व्यवस्थालाई आधार मानेर समाधान गर्न कांग्रेस नेताहरु सहमत भएका छन् ।

फेरि सर्‍यो कांग्रेस केन्द्रीय कार्यसमिति बैठक

“१६ बुँदेमा सबैभन्दा बढी उठाएको विषय भनेको पार्टीको विधान विपरित क्रियाशील सदस्यता वितरण भयो भन्ने हो । त्यसलाई सच्याउँदै विधानले जे भन्छ त्यसको भावनाअनुसार गर्ने भन्ने कुरामा करिब-करिब सहमति भएको छ । सदस्यताका सम्बन्धमा विधानलाई अक्षरशः पालना गरेर अगाडि जाने, त्यसो नभएका ठाउँहरुमा सच्याउने सहमति भएको छ,” नेता केसीले भने, “जनसम्पर्क समिति, निर्वाचन नभएका भ्रातृ संगठनहरुका बारेमा पनि विधानअनुसार जाने भन्ने भएको छ ।”

उनले विभाग गठन र विस्तारका बारेमा भने केही सहमति नजुटेको बताए । “विभाग गठनलाई हामी अस्वीकार नै गर्छौं । यसको अन्तिम निर्णय भइसकेको स्थिति छैन ।  त्यसमा कुनै सहमति भएको छैन । हामी विभाग मान्दैनौं ।”

पदाधिकारी बैठक सहमति उन्मुख देखिए पनि कांग्रेसले सोमबारका लागि बोलाएको केन्द्रीय कार्यसमिति बैठक भने स्थगित गरेको छ । सहमहामन्त्री डा. महतले उपसभापति विमलेन्द्र निधि र पूर्वमहामन्त्री कृष्णप्रसाद सिटौला होम आइसोलेसनमा रहेका कारण बैठक स्थगित गरिएको जानकारी दिए ।   

“केन्द्रीय कार्यसमिति बैठक उपसभापति र सिटौलाजी आइसोलेसनमा रहनुभएका कारण २७ गते बस्ने भएको छ । भोलि टेस्ट गर्दै हुनुहुन्छ । रिजल्ट आएपछि उहाँहरु पनि बैठकमा सहभागी हुनुहोला भनेर बैठक सारिएको हो,” उनले भने ।

केन्द्रीय कार्यसमिति बैठकलाई मध्यनजर गरेर केही दिनअघि गरिएको कोरोना परीक्षणका क्रममा उपसभापति निधि र पूर्वमहामन्त्री सिटौलाको सुरक्षार्थ तैनाथ सुरक्षाकर्मीमा कोरोना भाइरसको संक्रमण देखिएको थियो । 

फाइल तस्बिर ।