दसैंका उपत्यका बाहिर जानेहरूको संख्या धेरै ठूलो थियो । भरपर्दो तथ्यांक उपलब्ध नभए पनि करिब २५ लाख जनसंख्या उपत्यकाबाहिर गएको अनुमान गरिएको छ । दसैं नजिकिँदै जाँदा सरकारले आवागमन सहज बनाउन विशेष प्रबन्ध गरेको थियो । विशेषगरी कलंकी – नागढुंगा – नौबीसे खण्डमा सवारीको चाप धेरै भएर आउन जान निकै कठिन हुन्थ्यो । तर, ठूला मालवाहक सवारी साधन चल्न नदिएर सडकमा ट्राफिक प्रहरीको व्यापक परिचालन गरेर यात्रा अपेक्षाकृत सहज बनाइएको थियो । यसका लागि यातायात व्यवस्था र ट्राफिक प्रहरीलाई यात्रुले धन्यवाद दिएका थिए । तर, कोजाग्रत पूर्णिमा सकिँदा नसकिँदै यात्रुको सुविधाका लागि गरिएका प्रबन्ध हटेको देखियो । फलस्वरूप, कलंकी – नौबीसे खण्डमा यात्रुले फेरि सास्ती पाउन थालेका छन् ।
ट्राफिक प्रहरीको परिचालन र सवारी साधनको आवागमन व्यवस्थित गर्दा कलंकी – नौबीसे खण्डमा यात्रा अपेक्षाकृत सहज हुनेरहेछ । दसैंका बेलामा बढेको सवारी चापसमेत व्यवस्थापनबाट धानिएको देखियो । विशेषगरी ठूला मालवाहक सवारी साधनले सडकको मूल खण्ड नओट्नेबित्तिकै अरू यात्रुवाहक र साना मालवाहक सवारी नरोकिइ चल्न पाउँदा रहेछन् । त्यस्तै ट्राफिक प्रहरीको बाक्लो उपस्थितिले दसैंका बेला दुर्घटना कम भयो भने बीचमा सडक नियम मिचेर सडक जाम गराउने प्रवृत्ति पनि केही नियन्त्रित भएको थियो । बीच बाटामा बिग्रने थोत्रा सवारी साधन तह लगाउन पनि ट्राफिक प्रहरीको उपस्थितिले सहज भएको हुनुपर्छ । दुर्भाग्य, यात्रुको सुविधा र सुरक्षा बढ्ने यस्तो प्रबन्ध स्थायी हुनुपर्नेमा दसैंमा उपत्यकाबाहिर गएकाहरू नै सबै नफर्कँदासम्म पनि कायम रहेन ।
पृथ्वी राजमार्ग नै ठूला मालवाहक सवारी चलाउने गरी बनाइएको हैन । अहिले यो बाटोमा चलाउन थालिएका आठ, दस, बाह्र पांग्रे मालवाहक ट्रक र कन्टेनर नौबीसे – नागढुंगा खण्डले मात्र हैन मुगलिङ – नौबीसे खण्डले समेत धान्न सक्तैन । मुगलिङबाट नौबीसेसम्म जसोतसो ताने पनि नौबीसेपछिको उकालोमा ती ठूला मालवाहक सवारी चल्न निकै मुस्किल भएको देखिन्छ । त्यसमाथि गिटी बालुवा बोक्ने ट्रिपरहरू थपिएपछि यात्रुवाहक सवारीका लागि बाटो बाँकी नै रहँदैन । अत्यन्त सुस्त गतिमा चल्ने टूला ट्रक र उत्ताउलो गतिको ट्रिपरको चेपमा पर्दा साना ठूला सबै यात्रुवाहक सवारी चलाउन कठिन एवं जोखिमी भएको देखिन्छ । ठूला यात्रुवाहक ट्रक र ट्रिपरहरूलाई रातिको समयमा मात्र चल्न दिने हो भने यही बाटामा पनि यात्रुवाहक सवारी सुरक्षित र सुविधाजनकरूपमा चलाउन सकिन्छ । यात्रुको सुरक्षा र सुविधा यातायात व्यवस्थापनको प्राथमिकता हुनुपर्छ । ठूला ट्रक एक रात काठमाडौं आउने र अर्को रात काठमाडौंबाट जाने गरी व्यवस्था मिलाएमा यात्रुवाहक तथा सामान्य मालवाहक ट्रकहरू सजिलै आवतजावत गर्न सक्नेछन् । दसैंका बेलामा जस्तो ठूला ट्रकलाई रोक्न नसक्ने हो भने तिनलाई आलोपालो एकतर्फी बनाएमा पृथ्वी राजमार्गको ट्राफिक व्यवस्थापन सहज हुनेछ । सरकारले अनुभव गरिसकेको यस व्यवस्थालाई दसैंपछि हटाउनुको तात्पर्य बुझ्न सकिँदैन । सरकारी सोच यात्रुलाई सास्ती नै दिनुपर्छ भन्ने त होइन होला नि !