काठमाडौं । नेपाल कम्युनिष्ट पार्टी (ने क पा)ले नेता माधवकुमार नेपालको प्रस्ताव अस्वीकृत गरेको छ । आज बसेको ने क पाको सचिवालय वैठकले माधव नेपालले अघि सारेको प्रस्ताव अस्वीकृत गरेको हो । 

भदौ २८ गते बसेको पार्टी सचिवालय बैठकले एकीकरणसम्बन्धी नयाँ मापदण्ड तयार पार्न पार्टी अध्यक्षद्वय केपी शर्मा ओली र पुष्पकमल दाहाललाई जिम्मेवारी दिएको थियो । असोजको पहिलो साता बसेको सचिवालयले प्रदेशको अध्यक्ष, सचिव, इन्चार्ज र सहइन्चार्ज नै तोकेपछि ने क पाका तेस्रो वरियताका नेता नेपालले असहमति जनाउँदै लिखित असन्तुष्टि राखेका थिए । 

ने क पा नेता झलनाथ खनालले नेता नेपालले राखेको विषयमा गम्भीर छलफल भएको र आगामी दिनमा विधी र पद्धती अनुसार अगाडि बढ्ने सहमति भएको बताए । एउटै व्यक्तिलाई दोहोरो जिम्मेवारी दिनेगरी गरिएको निणर्य यो पटकलाई फिर्ता नहुने तर आगामी दिनमा यस्ता निर्णय नगर्ने निर्णय भएको नेता खनालले बताए । 

मुख्यमन्त्री रहेका पृथ्वीसुब्बा गुरूङ र शंकर पोखरेललाई गण्डकी र ५ नम्बर प्रदेशको इन्चार्ज तोकेर दोहोरो जिम्मेवारी दिएकोप्रती नेता नेपालले असन्तुष्टि जनाएका थिए । 

बैठकले पार्टीको केन्द्रीय प्रवक्ता नारायणकाजी श्रेष्ठले उक्त जिम्मेवारीबाट दिएको राजीनामा अस्वीकृत गरेको छ । 

जिल्ला कमिटीको एकीकरण, जनवर्गीय संगठनको एकीकरण, सरकार सञ्चालनलगायतका विषयमा छलफल गर्न ७ गते पुनः बैठक बस्ने प्रवक्ता श्रेष्ठले जानकारी दिए ।