काठमाडौं । सांसदहरूले वाइडबडी जहाज प्रकरणको छानबिनका लागि संसदीय समिति बनाउन माग गरेका छन् । सिंहदरबारमा मंगलबार बसेको प्रतिनिधिसभाअन्तर्गतको अन्तर्राष्ट्रिय सम्बन्ध र पर्यटन समितिको बैठकमा सांसदहरूले समितिकै पहलमा वाइडबडी जहाज प्रकरणमा छानबिन गर्न संसदीय समिति बनाउन गरेका हुन् ।

बैठकमा राष्ट्रिय स्वतन्त्र पार्टी (रास्वपा)का सांसद शिशिर खनालले वाइडबडी जहाज प्रकरणमा नेपालका अधिकारीलाई घुस दिएको सार्वजनिक भइसकेको अवस्थामा संसदीय समितिबाट छानबिन गर्नुपर्ने बताए ।

विशेष अदालतले अख्तियारको छानबिनमा समेत प्रश्न उठाएकाले छानबिन समिति बनाउन पहल गर्नुपर्ने उनको भनाइ छ । उनले वायुसेवा निगमले व्यावसायिक हिसाबले काम गर्न नसकेको जिकिर गरे ।

त्यस्तै, सांसद प्रेम सुवालले वायुसेवा निगमको जहाज खरिदका क्रममा उठेका विषयमा छानबिन हुनुपर्ने बताए ।

सांसद देवी प्रकाश भट्टचनले पनि वायुसेवा निगमलाई जोगाउन समयमै आवश्यक कदम चाल्नुपर्ने बताए ।

बैठकमा नेपाल वायुसेवा निगमका कार्यकारी अध्यक्ष युवराज अधिकारीले जहाजका सामान समयमै नपाउँदा मर्मत कार्यमा ढिलाए हुने गरेको बताए । उनले नियतवस हुने ढिलाइको निगमले सुक्ष्म ढंगले अनुसन्धान गर्ने गरेको बताए ।

अधिकारीले साढे १० प्रतिशत ब्याजमा जहाज किनेर नाफा कमाउने विषय उचित नभएको पनि बताए । निगमको ऋण चुक्ता गर्न किस्ता बढाउन र उचित सहुलियत माग गरे पनि सम्बोधन हुन नसकेको उनको भनाइ छ ।

बैठकमा संस्कृति, पर्यटन र नागरिक उड्डयनमन्त्री बद्री पाण्डेले हवाईजहाज खरिद प्रकरणदेखि सञ्चालन र टिकट वितरणमा सुधार गर्नुपर्ने देखिएको धारणा राखे ।