काठमाडौं ।  यु–१८ महिला साफ च्याम्पियनसिपको उपाधिका लागि आज नेपाल बंगलादेशसँग खेल्दैछ ।  भुटानको राजधानी थिम्पुस्थित चालिमिथाङ रंगशालामा उपाधि भिडन्त बेलुका ७ बजे सुरु हुनेछ । दुबै टोली एकै समूहबाट विजेता र उपविजेता बन्दै सेमिफाइनलमा प्रवेश गरेका थिए ।

सेमिफाइनलमा नेपालले भारतलाई टाइबे्रकरमा ३–१ ले पराजित गर्दै फाइनलमा स्थान बनाएको हो । जसमा नेपाली गोलरक्षक अन्जना रानामगरले उत्कृष्ट प्रदर्शन गरेकी थिइन् । 

उनले भारतका २ पेनाल्टी प्रहार रोकेकी थिइन् । बंगलादेशले भने आयोजक भुटानविरुद्ध ४–० जित निकाल्दै फाइनलमा नेपालसँगको भेट तय गरेको थियो । प्रतियोगितामा बलियो प्रतिद्वन्द्वी बंगलादेशले यसअघि समूह चरणमा नेपाललाई २–१ ले पराजित गरेको थियो । नेपाल आज समूह चरणमा बंगलादेशसँग बेहोरेको हारको बदला लिँदै उपाधि जित्ने रणनीतिमा छ ।

यता समूह चरणमा नेपाललाई हराइसकेकाले बंगलादेश उच्च मनोबलमा रहनेछ । अपराजित रहेको बंगलादेशविरुद्ध जित निकाल्न समूह चरणको खेलमा गरेको कमजोरीलाई सुधार्ने प्रशिक्षक हरीओम श्रेष्ठले बताए ।