पोखरा । पोखरामा बुधबारबाट दोस्रो संस्करणको वुमन्स च्यालेन्जर कप टी–२० क्रिकेट प्रतियोगिता सुुरु भएको छ । कास्की जिल्ला क्रिकेट संघको आयोजनामा पोखरा रंगशालास्थित क्रिकेट मैदानमा  भएको खेलमा पहिलो दिन टिम अकला र टिम विन्ध्यवासिनीले जित हासिल गरे । 

प्रतियोगिताको उद्घाटन खेलमा टिम अकलाले टिम बाराहीमाथि १० विकेटको जित हासिल गर्‍यो । ९८ रनको विजयी लक्ष्य पाएको टिम अकलाले ९.४ ओभरमा पूरा गर्‍यो । ओपनर सिर्जना पौडेलले ३९ बलमा सर्वाधिक ४६ रनको योगदान दिइन् । सुुस्मिता श्रेष्ठले २९ बलमा १४ रन बनाउँदै अविजित रहिन् । 

त्यसअघि टस जितेर ब्याटिङ थालेको बाराहीले १९.१ ओभरमा ९७ बनाउँदा अलआउट हुन पुुग्यो । बाराहीका लागि रिया तामाङले २६ बलमा २४ रन बनाउँदै नटआउट रहिन् । यस्तै, रिया गुरुङले ११ रन जोडिन् । अकलाका लागि सिर्जना पौडेलले ३.१ ओभरमा १३ रन खर्चेर सर्वाधिक ४ विकेट लिइन् । सुशीला डिमडोङले १ विकेट लिइन् । सिर्जना खेलको प्लेयर अफ दी म्याच घोषित भइन् ।

दोस्रो खेलमा विन्ध्यवासिनीले भद्रकालीलाई १ विकेटले हरायो । ८४ रनको विजयी लक्ष्य पाएको विन्ध्यवासिनीले १८.२ ओभरमा ९ विकेट गुमाउँदै जित हासिल गर्‍यो । खेलको प्लयेर अफ दी म्याच विन्ध्यवासिनीकी चन्द्रमाया बराल घोषित भइन् । उनले ४ विकेट लिइन भने ५ रन जोडिन् । त्यसअघि टस जितेर ब्याटिङ थालेको भद्रकालीले १९.२ ओभरमा ८३ रन बनाउँदै अलआउट हुन पुग्यो ।

उद्घाटन सत्रमा कास्की जिल्ला क्रिकेट संघका उपाध्यक्ष दीपेन्द्र चन्दले खेलाडीलाई आफ्नो खेल कौशल देखाउन आग्रह गरे । प्रधानमन्त्री कप महिला क्रिकेट प्रतियोगिता र दशौँ राष्ट्रिय खेलकुद प्रतियोगिताका लागि छनोट खेल समेत भएकाले छनोट हुने गरी प्रदर्शन गर्न उनले आग्रह गरे । 

तीन दिनसम्म चल्ने प्रतियोगितामा कास्कीबाट छनोट भएका खेलाडीले प्रदेशको छनोट खेल्नेछ । राष्ट्रिय क्रिकेट टिमका लागि पहिलो खुड्किलो भएकाले मिहिनतका साथ खेल्न उनले आग्रह गरे । 

प्रतियोगितामा कुल चार टिमको सहभागिता रहेको छ । दुई दिन खुल्ला क्याम्प राखेर चार टिम बनाइएको हो ।