खेल
काठमाडौं । विभागीय टोली सशस्त्र प्रहरीको (एपीएफ) क्लब र पूर्वाञ्चलले राष्ट्रिय महिला क्रिकेट प्रतियोगितामा विजयी सुरुआत गरेका छन् । शनिबारबाट सुरु प्रतियोगिताको पहिलो दिन एपीएफले मध्यमाञ्चललाई तथा पूर्वाञ्चलले पश्चिमाञ्चललाई पराजित गर्दै विजय सुरुआत गरेको हो ।
कीर्तिपुरस्थित त्रिवि क्रिकेट मैदानमा भएको उद्घाटन खेलमा एपीएफले मध्यमाञ्चलमाथि ६ विकेटको जित निकाल्यो । वर्षाका कारण १६ ओभरमा छोट्याइएको खेलमा एपिएफले ४० रनको झिनो लक्ष्य पाएको थियो । मध्यमाञ्चलले दिएको ४० रनको झिनो लक्ष्य एपीएफले ८ ओभर १ बलमा मात्र चार विकेट गुमाएर पूरा ग¥यो । एपीएफका लागि ज्योति पाण्डेले सर्वाधिक १६ रनको योगदान दिइन् । यस्तै विनु बुढामगर ९ तथा रितु कानोजिया ८ रनमा अविजित रहे । सरिता मगर दुई तथा सीता रानामगर एक रनमै पभेलियन फर्कदा प्यारी चौधरीले रनको खाता खोल्न सकिनन् । मध्यमाञ्चलका रोजी कडारीले दुई तथा अस्मिना कर्माचार्यले एक विकेट हात पारिन् ।
यसअघि टस जितेर पहिले ब्याटिङ गरेको मध्यमाञ्चलले निर्धारित १६ ओभरमा ८ विकेट गुमाएर ३९ रनमात्र बनाउन सक्यो । उसका लागि शोभा आलेले १२ तथा शारदा वाग्लेले १० रन जोड्नुबाहेक अन्य ब्याट्सवुमनले राम्रो प्रदर्शन गर्न सकेनन् । रचना अर्याल चार रनमा अविजित रहँदा सीता श्रेष्ठ तीन तथा अस्मिना कर्माचार्य दुई रनमै पभेलियन फर्किइन् । तीन ब्याट्सवुमन समान एक–एक रनमा आउट भइन् । मध्यमाञ्चललाई सस्तैमा समेट्ने क्रममा एपिएफका निरा राजोपाध्यय, सरिता मगर र करुणा भण्डारीले समान २–२ विकेट लिइन् ।
यस्तै शनिबारै भएको दोस्रो खेलमा पूर्वाञ्चलले पश्चिमाञ्चललाई ९ विकेटको फराकिलो अन्तरले पराजित गर्दै प्रतियोगितामा सुखद् सुरुआत ग¥यो । पश्चिमाञ्चलले दिएको ३९ रनको झिनो लक्ष्य पूर्वाञ्चलले ८ ओभरमा एक विकेट गुमाएर पूरा ग¥यो । पूर्वाञ्चलको जितमा काजोल श्रेष्ठले २१ रनको अविजित पारी खेलिन् । यस्तै रश्मी शर्मा पनि १३ रनमै अविजित रहिन् । यसका अनुराधा चौधरी दुई रनमा सीमा थापाको बलमा क्याच आउट भएकी थिइन् ।
यसअघि टस हारेर पहिले ब्याटिङको निम्तो पाएको पश्चिमाञ्चलले १८.२ ओभरमा सबै विकेट गुमाएर ३८ रनमात्र जोड्न सक्यो । ओपनर वर्षा रानाले १६ रनको पारी खेलेपनि अन्य ब्याट्सवुमनले राम्रो प्रदर्शन गर्न नसक्ला टिमलाई फराकिलो रनमा डो¥याउन सकेनन् । सरिता पुन ११ रनमा आउट भईन् । पश्चिमाञ्चललाई सस्तैमा समेट्ने क्रममा पूर्वाञ्चलका सन्तोषी चौधरीले चार विकेट हात पारिन् । रुविना क्षेत्री र कविता गौतमले समान २–२ विकेट लिदा सरस्वती चौधरीले एक विकेट हात पारिन् ।
टि–२० फम्र्याटमा सञ्चालन हुने प्रतियोगितामा पाँच विकास क्षेत्र र सशस्त्र प्रहरी बल(एपीएफ) को महिला टोली सहित ६ टिमले सहभागिता जनाएका छन् । प्रतियोगितामा सहभागी टोलीलाई दूई समूहमा टिम बिभाजन गरि लिगका आधारमा खेलाइने छ । शीर्ष दुई टिम फाइनलमा प्रतिस्पर्धा गर्नेछन् ।
सिनियर महिला क्रिकेटको इतिहासमै पहिलो पटक बिजेता टिमले नगद १ लाख तथा उपविजेताले ५० हजार प्राप्त गर्नेछन् । यस्तै प्रतियोगिताको उत्कृष्ट खेलाडी, उत्कृष्ट ब्याट्सवूमन, उत्कृष्ट बलर, उदयमान खेलाडी आदि बिधामा पनि पुरस्कृत गरिनेछ ।
प्रतियोगितालाई आईसीसी महिला विश्वकप छनोट २०१६ को लागि खेलाडी छनोटको रुपमा हेरिएको छ । प्रतियोगिताबाट २४ उत्कृष्ट खेलाडी छनोट गरी साउनको अन्तिमबाट बन्द प्रशिक्षणमा राखिने राखेपले जनाएको छ । खेलाडी छनोट नेपाली राष्ट्रिय टोलीका प्रशिक्षक जगत टमाटा, श्यामसन जंग थापा, सुदिप पौडेल, अरुण अर्याल र विनायक पोखरेल रहेका छन् । तर, विश्वकप छनोटका लागि १४ सदस्यीय टोली भने अन्तर्राष्ट्रिय क्रिकेट परिसद आईसीसीका प्रतिनिधीसहितको छनोट समितिले गर्ने राखेपले जनाएको छ ।
इंग्ल्यान्डमा अर्को वर्ष हुने आईसीसी महिला विश्वकप क्रिकेटको एसियाली छनोटमा नेपालले हङकङ, चीन र थाइल्याण्डसंँग प्रतिस्पर्धा गर्नेछ । नेपाल सम्मलित एसियाली छनोटको आयोजना हङकङमा आगामी अक्टोबरमा हुनेछ । एसियाली छनौटमा आयोजक हङकङसँगै नेपाल, चीन र थाइल्याण्डले राउन्ड रोबिनका आधारमा खेल्नेछन् । आईसीसीले छनोट खेल अक्टोबर ९ देखि १५ मा हुने जनाएको छ ।
प्रकाशित मिति: शनिबार, साउन ८, २०७३ १९:३१
प्रतिक्रिया दिनुहोस्