विदेश
वासिङटन । विश्वकै तेस्रो धनीमा अमेजनका संस्थापक जेफ बेजोसले वारेन बफेटलाई उछिनेको ब्लुमबर्गको बिलिनियर इन्डेकसले जनाएको छ । ब्लुमबर्गको सूचीमा जेफको सम्पत्ति बफेटको ६५ अर्ब डलर भन्दा बढी देखिएको छ । जेफ भन्दा माथि बिल गेट्स र अमान्सियो ओर्टेगा मात्रै छन् ।
यद्यपि बेजोसको सम्पत्तिमा पनि १३ करोड ६० लाख डलरले कमी आएको छ । अमेजनको सेयरमा आएको ०.२ प्रतिशतको गिरावटसँगै उनको सम्पत्तिमा पनि कमी आएको हो ।
बफेटको सम्पत्तिमा पनि ७५ करोड ४० लाख डलरले कमी आएको सूचकांकले देखाएको छ । बर्कशायर हाथवेको सेयर मूल्यमा आएको १.२ प्रतिशतको गिरावटले उनको सम्पत्तिमा कमी आएको हो । तर, फोब्र्सका अनुसार बेजोस अझैपनि बफेट भन्दा तल छन् । फोब्र्सका अनुसार बफेटको सम्पत्ति ६४.८ अर्ब डलर छ भने बेजोसको ६४.६ अर्ब डलर छ ।
फोब्र्सले यो वर्षको वर्गिकरण सुरु गर्दाको समयमा बफेट भन्दा धेरै पछाडि रहेका थिए । उनी ४५.२ अर्ब डलरको सम्पत्ति सहित ५ औं स्थानमा थिए । यो वर्ष अमेजनको सेयर १० प्रतिशतले उकालो लागिसकेको छ । यो महिना फर्मको सेयर कीर्तिमानी उच्च कायम भएको छ । एजेन्सी
प्रकाशित मिति: शनिबार, साउन ८, २०७३ १६:०८
प्रतिक्रिया दिनुहोस्