काठमाडौँ । क्रिकेटको मक्का मानिने लर्ड्स क्रिकेट मैदानमा ऐतिहासिक जित हासिल गरेको नेपाली राष्ट्रिय क्रिकेट टिम भोलि (बिहीबार) स्वदेश फर्कदै छन् । इंग्ल्यान्ड भ्रमणमा रहेको नेपाली क्रिकेट टिमले मंगलबार विश्वकै पुरानो क्रिकेट क्लब मेरिलिबोन क्रिकेट क्लब (एमसिसी) बिरुद्धको अन्तिम मैत्रीपुर्ण खेल सकिएसंगै नेपाली टोली स्वदेश फर्किन लागेको हो ।

लर्ड्स मैदानमा नेपालले मंगलबार एमसिसीलाई  ४१ रनले पराजित गर्दै ऐतिहासिक जित निकालेको थियो  । नेपालले दिएको २ सय १८ रनको लक्ष्य पछ्याएको एमसिसीले ४७ ओभर १ बलमा अलआउट १ सय ७६ रनमा समेटिएपछि नेपालले लर्ड्समा ऐतिहासिक जित पाएको हो । 

नेपालले पहिलोपटक लर्ड्स क्रिकेट मैदानमा खेल्ने अवसर पाएको हो । र, नेपालले पहिलो खेलमा नै जित हासिल गरेको हो । लर्ड्स मैदानमा नेपाल जस्ता एसोसियट राष्ट्रहरूले खेल्ने मौका कमैले पाउने गर्छ । तर, नेपाल र ब्रिटेनबीचको कुटनीतिक सम्बन्ध स्थापना भएको २ सय वर्ष पुगेको अवसरमा लर्ड्समा नेपालले खेल्न अवसर पाएको हो ।

नेपालले यसअघि स्थानीय चार टोलीसंग पनि मैत्रीपूर्ण खेल खेलेको थियो । ति चार खेलमै नेपालले जितेको थियो । नेपाली टोलीले आइतबार राति भएको एकदिवसीय खेलमा इस्टबर्नलाई १ सय ८१ रन तथा शनिबार राति भएको खेलमा कन्फ्रेन्स क्रिकेट क्लबलाई ४ विकेटले हराएको थियो । यस्तै बिहीबार भएको टि– ट्वान्टीमा नेपालले इन्डियन जिमखानालाई २० रनले पराजित गरेको थियो भने बुधबार भएको ४० ओभरको खेलमा फ्रि रेस्टरलाई १ सय २९ रनले पराजित गरेको थियो । 

इंग्ल्यान्ड भ्रमणलाई नेपालले विश्व क्रिकेट लिग च्याम्पियनसिप अन्तरगत नेदरल्याण्डसँगको खेलको तयारीको रुपमा समेत लिएको छ । नेपालले नेदरल्याण्डसँग आगामी साउन २९ र ३१ गते उसैको मैदानमा खेल्नेछ । विश्व क्रिकेट लिग च्याम्पियनसिपमा तेस्रो चरणको खेल सकिँदा नेपाल नेपाल छैटौं स्थानमा छ ।