काठमाडौं । इग्ल्यान्ड भ्रमणमा रहेको नेपाली राष्ट्रिय क्रिकेट टोलीले मंगलबार क्रिकेटको मक्का मानिने लर्ड्स मैदानमा ऐतिहासिक खेल खेल्दैछ । नेपाली टोलीले मंगलबार विश्वकै पुरोनो क्लब मेरिलिबोन क्रिकेट क्लब (एमसीसी)सँग लर्ड्समा एकदिवसीय मैत्रीपूर्ण खेल खेल्दैछ । 

 

क्रिकेटको मक्का मानिने लर्ड्स मैदानमा टेस्ट नखेल्ने राष्ट्रहरुले खेल्ने अवसर कमै पाउछन् । तर, नेपाल र ब्रिटेनबीचको कुटनीतिक सम्बन्ध स्थापना भएको २ सय वर्ष पुगेको अवसरमा लर्ड्समा नेपालले खेल्न लागेको हो । इंग्ल्यान्ड भ्रमणमा रहेको नेपाली टोलीले यसअघि स्थानीय चार क्लबसँग मैत्रीपूर्ण खेल खेलेको थियो । लर्ड्स मैदानमा हुने खेल नेपाली सयम अनुसार दिउँसो सवा तीन बजेपछि सुरु हुनेछ ।

 

लर्ड्समा हुने एमसीसीसँगको खेललाई नेपाली खेलाडीहरु खेल जीवनकै सबै भन्दा ठूलो उपलब्धी मान्छन् । एमसीसीसँगको खेलअघि नेपाली टोलीका कप्तान पारस खड्काले लर्ड्समा खेल्नु सबैको सपना हुने र  खेललाई लिएर नेपाली टोली उत्साहित रहेको बताएका छन् । 

 

“सबै उत्साहित छौं । हामी निकै उत्सुकतापूर्वक प्रतिक्षा गरिरहेका छौं । हामी सबै शतप्रतिशत आफ्नो खेल खेल्नेछौं,” कप्तान पारसले भने, “यहाँ खेल्नु सपना पुरा भए बराबर हो ।  हामी यो दिनको प्रतिक्षामा थियौं । त्यस्तै लड्समा क्षमता देखाउन हामीलाई यो राम्रो मौका हो । ” कप्तान खड्काले इंग्ल्यान्ड टुर एमसीसीसँगको खेल मैत्रीपूर्ण मात्र नभई  विश्व क्रिकेट लिग च्याम्पियनसिप अन्तरगत नेदरल्याण्डसँगको खेलको तयारी समेत भएको बताए । 

 

“हामी मैत्रीपूर्ण खेलका लागि मात्र होइन, इंग्ल्यान्ड टुर नेदरल्याण्डसँगको खेलको तयारीका लागि पनि आएका हौं । त्यसले एमसीसीसँग हाम्रो उत्कृष्ट ११ टिम उत्रनेछ । एमसीसीले पक्कै पनि राम्रो खेल्छ । हामीले पनि राम्रो खेल्नु पर्छ,”  कप्तान पारस खड्काले थपे, “हामीले यसलाई विश्व स्तरमा नेपाली क्रिकेटलाई प्रस्तुत गर्ने अवसरका रुपमा लिएका छौं । यो मौका पाउदा हामी खुसी र गौरवान्वित छौं । लड्समा सधै खेल्ने अवसर जुट्दैन । नेपाली क्रिकेटमा आबद्ध सबैका लागि यो विशेष दिन हो । समग्र नेपाली खेलकुदकै लागि पनि यो महत्वपूर्ण दिन हो । ”

 

विश्व क्रिकेट लिग च्याम्पियनसिप अन्तरगत नेपालले नेदरल्याण्डसँग आगामी साउन २९ र ३१ गते उसैको मैदानमा खेल्नेछ । विश्व क्रिकेट लिग च्याम्पियनसिपमा तेस्रो चरणको खेल सकिँदा नेपाल नेपाल छैटौं स्थानमा छ ।

 

यस्तै नेपाली टोलीका प्रशिक्षक जगत टमाटाले लर्ड्समा हुने खेललाई ऐतिहासिक दिनको रुपमा रहेको बताए । “यो पुरै नेपाली क्रिकेटको लागि ऐतिहासिक दिन हो । किनकि नेपालले लर्ड्समा पहिलोपटक खेल्दैछ,” यो अवसर हम्रो लागि मौका र च्यालेन्ज दुवै हो । र मेरा खेलाडीहरु खेल्न तयार छन् । सबै खेलाडी खेलका लागि उत्साहित छन् ।” त्यस्तै प्रशिक्षक टमाटाले एमसीसीसँगको खेललाई मैत्रीपूर्ण खेलका रुपमा नलिएको र यसलाई प्रतिस्पर्धात्मक खेलका रुपमा लिएको बताए ।

 

नेपाल र एमसीसीबीचको खेल लाइभ हेर्नुस ....https://www.youtube.com/watch?v=1sIdXDorVtk