खेल
पाकिस्तानी लेग स्पिनर यासिर शाह अन्तराष्ट्रिय क्रिकेट परिसद (आईसीसी) को टेस्ट बलरको बरियताको शीर्ष स्थानमा उक्लिएका छन् । आईसीसीले सोमबार जारी गरेको टेस्ट बलरको बरियता क्रममा यासिर शीर्ष स्थानमा उक्लिएका हुन् ।
यासिर ११ वर्षपछि आईसीसीको बरियताको शीर्ष स्थानमा पुग्ने पहिलो लेग स्पिनर बलर हुन् । यासिर सन् २००५ मा अष्ट्रेलियन लेग स्पिनर सेन वार्नपछि शीर्ष स्थानमा पुग्ने पहिलो लेग स्पिनर हुन् । त्यस्तै यासिर मुस्ताक अहमेदपछि टेस्ट बरियताको शीर्ष स्थानमा पुग्ने पहिलो पाकिस्तानी बलर हुन् । सन् १९९६ को डिसेम्बरमा पाकिस्तानी बलर अहमेद टेस्ट बरियताको शीर्ष स्थानमा पुगेका थिए ।
यासिरले इंग्ल्यान्डका जेम्स एण्डरसनलाई पछि पार्दै आईसीसीको टेस्ट बलर बरियतामा शीर्ष स्थानमा पुगेका हुन् । यासीरले आइतबार राती सकिएको इंग्ल्यान्डबिरुद्धको पहिलो टेस्टमा १० विकेट लिएका थिए । उक्त पहिलो टेस्टमा पाकिस्तानले इंग्ल्यान्डलाई ७५ रनले पराजित गरेको थियो ।
आईसीसीले जारी गरेको टेस्ट बलरको बरियताको दोस्रो स्थानमा भारतका रविचन्द्र आश्विन रहेका छन् । त्यस्तै यसअघि शीर्ष स्थानमा रहेका इंग्ल्यान्डका बलर जेम्स एण्डरसन तेस्रो स्थानमा छन् । आईसीसीले जारी गरेको बरियताको चौथो स्थानमा इंग्ल्यान्डकै स्टुवार्ड बोर्ड र दक्षिण अफ्रिकाका स्टेन डाले पाँचौ स्थानमा छन् ।
यस्तै टेस्ट क्रिकेटको ब्याटिङतर्फ अस्ट्रेलियन कप्तान स्टेभेन स्मिथ शीर्ष स्थानमा रहेका छन् । टेस्ट ब्याट्सम्यान वरीयताको दोस्रो स्थानमा न्युजिल्यान्डका काने विलियम्सन रहेका छन् । यस्तै दक्षिण अफ्रिकाका हसिम अमला तेस्रो स्थानमा रहदा इंग्ल्यान्डका जोए रुट चौथो र दक्षिण अफ्रिकाका एबी डी भिलियर्स पाचौ स्थानमा रहेका छन् । एजेन्सी
प्रकाशित मिति: सोमबार, साउन ३, २०७३ १७:३१
प्रतिक्रिया दिनुहोस्