काठमाडौं । विभिन्न कम्पनीले मोटरसाइकल किस्ताबन्दीमा बिक्री गर्दा लाग्ने ब्याजदर फरक–फरक देखिएको छ । विभिन्न मोटरसाइकलकोे खरिदमा तिर्नुपर्ने अनिवार्य रकमसमेत फरक–फरक छ । 

एकै कम्पनीले पनि मोटरसाइकलको सीसीअनुसार तिर्नुपर्ने अनिवार्य रकम र यसको ब्याजदरसमेत फरक–फरक तोकेको पाइन्छ । केटिएम बाइकको नेपालका लागि आधिकारिक विक्रेता हुलास इन्भेस्टमेन्ट प्रालिले ल्याएका केटिएम २०० आरसी, केटिएम ३९० आरसी, केटिएम २०० र केटिएम ३९० बाइकमा कुल मूल्यको ३० प्रतिशत रकम खरिदको क्रममा अनिवार्य तिर्नुुपर्ने हुन्छ । साथै यसको किस्ताबन्दीमा १६ प्रतिशत ब्याजदर तोकिएको छ । 

केटिएम २०० आरसीको मूल्य ५ लाख १९ हजार ९ सय रुपैयाँ तोकिएको छ, जसमा २ लाख ७ हजार ९ सय ६० रुपैयाँ अनिवार्य भुक्तान गर्नुपर्छ । त्यस्तै, एक वर्षको बिमाको प्रिमियम ११ हजार ९ सय ३६ रुपैयाँ पर्न आउँछ ।  किस्ताबन्दीमा मोटरसाइकल खरिद गर्दा सुरुमा कुल तिर्नुपर्ने रकम २ लाख १९ हजार ८ सय ९६ रुपैयाँ छ । बाँकी ३ लाख ११ हजार ९ सय ४० रुपैयाँ भने किस्ताबन्दीमा तिर्नुपर्छ । 

५० प्रतिशत अनिवार्य रकम तिर्नुपर्ने केटिएम २०० आरसी किस्ताबन्दीमा खरिद गर्दा १४ प्रतिशत ब्याजदर कायम गरिएको छ । एक वर्षको बिमा प्रिमियमसहित सुरुमा २ लाख ७१ हजार ८ सय ८६ रुपैयाँ तिर्नुपर्छ । बाँकी २ लाख ५९ हजार ९ सय ५० रुपैयाँ भने किस्ताबन्दीमा तिर्नुपर्छ ।  

त्यस्तै, यामाहाको आधिकारिक विक्रेता एमएडब्ल्यू इन्टरप्राइजेज प्रालिका अनुसार एफजेड एसएफआई, एफजेडएफआई, रे जेड फो, फ्यासिनो, एसजेडआरआर कोर, स्यालुटो र अल्फा मोटरसाइकल किस्ताबन्दीमा खरिद गर्दा ४० प्रतिशत रकम अनिवार्य तिर्नुपर्छ । 

साथै किस्ताबन्दीमा खरिद गर्दा ब्याजदर भने १५ प्रतिशत कायम गरिएको  छ । यसको अवधि २ वर्षको हुने कम्पनीले जनाएको छ । तर, यामाहाको आर वानफाइभ मोटरसाइकल खरिद गर्दा भने अनिवार्य ५० प्रतिशत रकम भुक्तान गर्नुपर्छ भने यसको ब्याजदर पनि १५ प्रतिशत कायम गरिएको छ । 

बजाजका उत्पादनहरू पल्सर, डिस्कभर र प्लाटिना किस्ताबन्दीमा खरिद गर्दा मोटरसाइकलको कुल मूल्यको ३० प्रतिशत क्यास पेमेन्ट गरे १६ प्रतिशत ब्याजदरमा मोटरसाइकल लिन सकिन्छ । बजाजको आधिकारिक विक्रेता हसंराज हुलासचन्द एन्ड कम्पनी प्रालिले ५० प्रतिशत रकम तिरे १४ प्रतिशत ब्याजदरमा किस्ता उपलब्ध गराउने जनाएको छ । कम्पनीले तीन वर्षको अवधिसम्म किस्तामा मोटरसाइकल दिने बताएको छ । 

सुजुकीका मोटरसाइकल खरिद गर्दा भने २० प्रतिशतमात्रै रकम अनिवार्य रूपमा भुक्तान गर्नुपर्छ, जसमा १५ प्रतिशत ब्याजदर कायम गरिएको छ । टिभिएसको आधिकारिक विक्रेता जगदम्बा अटो प्रालिका अनुसार यो कम्पनीका मोटरसाइकलको खरिदमा ४० प्रतिशत रकम अनिवार्य रकम तिर्नुपर्छ, जसमा १५ प्रतिशत ब्याजदर कायम गरिएको छ भने अवधि २ वर्ष तोकिएको छ । 

टिभिएसका मोटरसाइकल र स्कुटरको खरिदमा १५ प्रतिशत ब्याजदर कायम गरिएको टिभिएसको टेकु सोरुमले जानकारी दिएको छ । 

हिरो कम्पनीको आधिकारिक विक्रेता नेपाल जनरल मार्केटिङका अनुसार १ सय २५ सीसीसम्मका मोटरसाइकलको खरिदमा ४० प्रतिशत रकम अनिवार्य भुक्तान गर्नुपर्छ ।

१ सय २५ सीसीभन्दा माथिका मोटरसाइकल खरिद गर्नेले भने ४० प्रतिशत रकम अनिवार्य भुक्तान गर्नुपर्छ । ४० प्रतिशत रकम तिरेपछि ९ प्रतिशत ब्याजदरमा हिरोका बाइक लिन सकिने कम्पनीले बताएको छ । त्यसैगरी, ६० प्रतिशत क्यास पेमेन्ट गरेको अवस्थामा ८ प्रतिशत ब्याजदरमा मोटरसाइकल उपलब्ध गराइन्छ । कम्पनीले २ वर्षको अवधिलाई मात्रै फाइनान्सको व्यवस्था गरेको हो । 

के–के कागजात चाहिन्छ ?

नागरिकताको फोटोकपी र ओरिजिनल 

दुईवटा फोटो 

दुईपांग्रेको सवारीचालक लाइसेन्स

आयस्रोतको कागजात 

रेसिडेन्स प्रुफ डकुमेन्ट

उपत्यकाबाहिर बस्ने भए थप यी कागजात चाहिन्छ ।

जमानीकर्ता

जमानीकर्ताको नागरिकता