सोल । उत्तर कोरियाका सर्वोच्च नेता किम जोङ उनले अमेरिकी मुख्यभूमिको जुनसुकै भागमा पुग्न सक्ने अन्तरमहादेशीय ब्यालेस्टिक क्षेप्यास्त्रको परीक्षणपछि आणविक धम्कीको जवाफ आणविक हतियारले नै दिइने प्रतिवद्धता जनाएका छन् ।
उत्तर कोरियाको सरकारी सञ्चार माध्यम केसीएनएले शनिबार उक्त क्षेप्यास्त्र प्रक्षेपणस्थलमा पहिलोपटक किम आफ्नी सानी छोरीसँग उपस्थित भएको पुष्टि गरेको याहुन्युजमा उल्लेख छ । सार्वजनिक भएको तस्बिरमा किम छोरीको हात समाउँदै परीक्षणस्थलमा हिँडिरहेको देखिन्छ ।
किमको निजी जीवनबारे निकै थोरै जानकारी मात्र बाहिरिने गरेको छ । किमकी छोरी रहेको पनि पहिलोपटक पुष्टि भएको हो ।
किमले गम्भीर मुद्रामा घोषणा गरेका छन्, “शत्रुहरुले निरन्तर आणविक आक्रमणको धम्की दिइरहेमा हाम्रो पार्टी र सरकारले पूर्णप्रतिवाद स्वरुप आणविक हातहतियारबाट प्रतिक्रिया जनाउने छन् ।”
शुक्रबार उत्तर कोरियाले राजधानी प्योङयाङबाट प्रहार गरेको ह्वासोङ– १७ क्षेप्यास्त्र उत्तरी जापानको होकाइदो टापुको पश्चिमतर्फको जलीय क्षेत्रमा खसेको थियो । जापानका प्रतिरक्षामन्त्री यासुकाजु हामादाका अनुसार सो क्षेप्यास्त्र करिब ६२० माइल टाढा र अधिकतम तीन हजार ७२८ माइल उचाइसम्म पुगेको थियो ।
आफूले बोक्ने आणविक हतियारको वजनको आधारमा यसले नौ हजार माइलभन्दा बढी दूरी तय गर्न सकिने भएकाले यो अमेरिकी मुख्यभूमिको जुनसुकै स्थानमा पुग्न सक्ने दाबी हामादाले गरेका छन् ।
यस क्षेप्यास्त्र प्रक्षेपणको प्रत्युत्तरमा अमेरिकी बी–१ बी बमवर्षक लडाकुहरुले दक्षिण कोरियाली र जापानी विमानहरुसँग छुट्टै संयुक्त अभ्यास गरेका छन् ।
यसै महिना भएको उत्तर कोरियाको यो दोश्रो ठूलो हतियार परीक्षण हो । यसबाट किमले आफूसँग अमेरिकी नेतृत्वको सैनिक गठबन्धनविरुद्ध सामना गर्न सक्ने हतियार रहेको देखाएका छन् । ह्वाइट हाउस र विश्वका अन्य नेताहरुले यस क्षेप्यास्त्र प्रक्षेपणको भत्र्सना गरेका छन् ।
अमेरिकी उपराष्ट्रपति कमला ह्यारिसले थाइल्यान्डमा चलिरहेको एपेक सम्मलेनमा यसै विषयलाई लिएर जापान, दक्षिण कोरिया, अष्ट्रेलिया, न्युजिल्यान्ड र क्यानडाका नेताहरुसँग आपतकालीन बैठक आयोजना गरेकी छन् ।
ह्यारिसले उत्तर कोरियाले पटकपटक संयुक्त राष्ट्रसंघको सुरक्षा परिषद्का निर्णयहरुको उल्लंघन गरेको बताएकी छन् ।
