काठमाडौं । उत्तर कोरियाली नेता किम जोङ उन आफ्नी छोरीसँग पहिलोपटक सार्वजनिक रूपमा देखा परेका छन् ।
किमकी छोरी किम चु–ए देशकै सबैभन्दा ठूलो अन्तरमहादेशीय ब्यालिस्टिक मिसाइल प्रक्षेपणको निरीक्षणमा उनीसँगै सहभागी भएकी थिइन् । चु–एकाे अस्तित्वकाे बारेमा लामाे समयदेखि हल्ला चलेकाे थियाे ।
सो मिसाइल प्रक्षेपणको बेला बाबु–छोरी हात समाएर उभिएको देखिन्छ । उत्तर कोरियाली सरकारी समाचार संस्था केसीएनएले उनीहरूको थुप्रै तस्बिर सार्वजनिक गरेको छ ।
किमले विश्वकै सबैभन्दा रहस्यमय राज्यहरूमध्ये एकको नेतृत्व गर्छन्, र उनको व्यक्तिगत जीवनको बारेमा धेरै कम थाहा छ ।
वासिङ्टन डीसीको स्टिम्सन सेन्टरका उत्तर कोरिया विशेषज्ञ माइकल म्याडेन चु–एको सार्वजनिक उपस्थिति महत्वपूर्ण रहेको बताउँछन् । याे आफ्नै रक्तसम्बन्धमा चाैथाे पुस्ताकाे शक्ति हस्तान्तरण हुने देखाउने किमकाे तरिका हुनसक्ने उनकाे भनाइ छ ।
किम उत्तर कोरियाली शासकको तेस्रो पुस्ता हुन् । चु–ए उत्तर कोरियाली शासकको चौथो पुस्ता हुन् ।
उत्तर कोरियाका जानकारहरू किमका दुई छोरी र एक छोरा गरी तीन सन्तान हुन सक्ने ठान्छन् । चु–ए तीमध्ये जेठी हुन् र उनको उमेर १२–१३ वर्ष भएको हुनसक्ने अनुमान गरिएको छ ।
किमकाे छाेरीसँगकाे सावर्जनिक उपस्थितिलाई बीबीसीलगायत अन्तराष्ट्रिय सञ्चार माध्यमहरूले प्राथमिकताका साथ खबर बनाएका छन् ।