काठमाडौँ । आगामी डिसेम्बरमा श्रीलंकामा हुने एसीसी यू–१९ पुरूष एसिया कप क्रिकेटमा नेपालले सहभागिता जनाउने भएको छ । एसियन क्रिकेट काउन्सिल (एसिसी) को आयोजनमा हुन लागेको एसिया कपमा टेष्ट मान्यता प्राप्त राष्ट्रसँगै नेपालले पनि सहभागिता जनाउन लागेको हो ।

प्रतियोगिता आगामी डिसेम्बर १० देखि २२ (मंसिर २५ देखि पुस ७ गते)सम्म हुनेछ, जसमा चार टेष्ट राष्ट्र र अन्य आईसीसीका एसोसियट राष्ट्र गरी आठ टोलीको सहभागिता रहनेछ । आठ देशलाई दुई समूहमा विभाजन गरी राउण्ड रोबिनका आधारमा खेलाइनेछ । 

एक दिवसीय फम्र्याटमा हुने प्रतियोगितामा टेष्ट मान्यता प्राप्त आयोजक श्रीलंका, पाकिस्तान, भारत र बंगलादेश छन् । यस्तै एसोसियट राष्ट्रमा नेपालसहित अफगानिस्तान, सिंगापुर र मलेसियाले प्रतिस्पर्धा गर्नेछन् । 

गत जनवरीमा नै एसीसीले तय गरिसकेको एसिया कपमा नेपालको सहभागिता पक्का भए पनि नेपालले तयारी सुरु गरेको छैन । प्रतियोगिता आउन एक महिना बाँकी रहँदा नेपालले खेलाडी छनोटसमेत गरेको छैन । 

क्यानले भने क्यान विवाद र आर्थिक कारणले तयारी गर्न नसकेको जनाएको छ । नेपाल क्रिकेट संघ क्यानका कार्यकारी सञ्चालक छुम्बी लामाले क्यान विवाद र आर्थिक अभावले तयारी गर्न नसकेको बताए । “अन्तर्राष्ट्रिय क्रिकेट परिषद (आइसीसी)ले नेपाललाई प्रतिबन्ध लगायो । आइसीसीको प्रतिबन्धसँगै क्यानमा आर्थिक समस्या छ,” लामाले भने, “आईसीसीले नेपाललाई खेल्ने अनुमति त दिएको छ र उनीहरुकै आयोजनमा हुने प्रतियोगिताको लागि मात्र आईसीसीले फन्ड उपलब्ध गराउँछ । तर, यो एसीसीको प्रतियोगिता भएकोले हामीलाई तयारी गर्न कठिन भएको हो ।“ 

लामाका अनुसार प्रतियोगितामा लाग्ने खर्च कसले बेहोर्ने हो भन्नेमा एसीसीबाट केही दिनमा निर्णय आउने र त्यहीअनुसार टोलीको तयारी थालिनेछ । “यो प्रतियोगिताको लागि हामीले अब सबै क्षेत्रबाट छनोट गरेर नयाँ खेलाडी ल्याउनुपर्छ । पुराना खेलाडीहरुको उमेर बढी भइसक्यो,” लामाले भने, “त्यसैले हामीलाई धेरै खर्च लाग्छ । तर, बजेट छैन । एसीसीको प्रतियोगिता भएकोले आइसीसीले हामीलाई बजेट दिँदैन ।” तर, लामाले प्रतियोगिताको लागि युवा तथा खेलकुद मन्त्रालयलगायत सरोकारवाला निकायसँग छलफल गरिरहेको बताए ।

एसीसी यू–१९ एसिया कप तेस्रो पटक हुन लागेको हो । यस प्रतियोगिता पछिल्लो पटक २०१३ –१४ मा यूएईमा भएको थियो । उक्त संस्करणमा भारतले उपाधि जितेको थियो । त्यसपछि मलेसियामा रहेको एसियन क्रिकेट काउन्सिलको कार्यालय बन्द भएपछि यो प्रतियोगिता बन्द भएको थियो । तर, एसीसीको कार्यालय श्रीलंकामा स्थापना भएपछि एसीसीले डिसेम्बर १० देखि २२ बाट यू –१९ एसिया कप गर्ने निर्णय गरेको थियो । मलेसियामा भएको प्रतियोगिताको पहिलो संस्करणको उपाधि भने पाकिस्तान भारतले संयुक्त जितेको थियो ।