काठमाडौं । चालु आर्थिक वर्षमा विदेशबाट प्राप्त हुने पेन्सन रकममा गिरावट आएको छ । अघिल्लो आर्थिक वर्षको तुलनामा चालु आवमा पेन्सन प्राप्ति ४.४ प्रतिशत गिरावट आई ६ अर्ब ९३ करोड २३ लाख रुपैयाँमा सिमित भएको छ । अघिल्लो वर्षको सोही अवधिमा ७ अर्ब २४ करोड ९७ लाख रुपैयाँ प्राप्त भएको थियो । नेपाल राष्ट्र बैंकका अनुसार गत आवको असारमा ४६ अर्ब ५१ करोड ३८ लाख रुपैयाँ पेन्सन प्राप्त भएको थियो ।

पेन्सन वेलायत र भारतबट बढी प्राप्त हुने गरेको छ । वेलायत र भारतलगायत अन्य केही मुलुकले नेपालीलाई सेनामा भर्ती गर्ने भएकाले अवकास प्राप्तपछि पेन्सन पाउदै आएका छन् । 

पेन्सनका अतिरिक्त नेपालले पाउने अनुदान रकममा पनि गिरावट आएको छ । चालु आर्थिक वर्षमा नेपालले पाउने अनुदान रकम १९.४ प्रतिशत गिरावट आई ८ अर्ब ८४ करोड ९७ लाख रुपैयाँ सिमित भएको छ । अघिल्लो वर्षको सोही अवधिमा १० अर्बं ९७ करोड ८९ लाख रुपैयाँ अनुदान प्राप्त भएको थियो । गत आवको असारसम्म ७० अर्ब ४१ करोड ७० लाख रुपैयाँ बराबर अनुदान पाप्त भएको नेपाल राष्ट्र बैंकले जनाएको छ । 

चालु आवमा रेमिट्यान्स आप्रवाह, पेन्सन र अनुदान प्राप्तिमा आएको गिरावटले शोधनान्तर ऋणात्मक भएको छ ।