काठमाडौं । तिहार नजिकिँदै गर्दा राजधानीमा झिलिमिली बत्तीको कारोबार बढेको छ । बत्ती र सयपत्री तथा मखमली मालाले बजारको सुन्दरता नै बढाएका छन् । 

झिलिमिली बत्ती किन्न आउने ग्राहकले बजारमा चहलपहल बढेको छ । परम्परागत पाला र मैनबत्तीको प्रयोग घट्दै गएपछि विद्युतीय बत्तीको प्रयोग बढ्न थालेको हो । टिकाउ र सजिलो हुने भएकाले विद्युतीय बत्ती किन्न आएको बताउँछिन् सुस्मिता थापा । “तिहार उत्सवको पर्व भएकाले घर उज्यालो बनाउनुपर्छ । विद्युतीय बत्ती एक पटक बाले रातभर बलिरहन्छ,” उनले भनिन् । झिलिमिली देखेर बच्चाहरु खुशी हुने भएकाले हरेक वर्ष झिलिमिली बत्ती बाल्ने गरेको रामकुमारी ढुंगानाले बताइन् । माटोका पाला र मैन बत्तीभन्दा विद्युतीय बत्ती सजिलो र राम्रो हुने उनको भनाइ छ । 

गत वर्षको भूकम्प र नाकाबन्दीले थलिएको तिहार व्यापार यसपालि बढेको व्यापारी बताउँछन् । महाबौद्धका व्यापारी दीपक भट्टराई गत वर्ष स्टक विद्युतीय ब्त्र िबिक्री गर्ने तरखरमा छन् । नाकाबन्दीले सामान ढिला आइपुग्दा ६०÷७० लाख घाटा लागेको उनले बताए । गत वर्षको तुलनामा ५० प्रतिशतले व्यापार बढेको उनको अनुमान छ । 

तिहारमा विद्युतीय बत्तीको माग बढेपछि व्यापारीमा समेत प्रतिस्पर्धा बढेको छ । उनको पसलमा ४० रुपैयाँदेखि २ हजारसम्मका विद्युतीय बत्ती पाइन्छ । 

विद्युतीय बत्ती बिक्री गर्न थालेको दुई दिनमा १५ हजारको बिक्री गरिसकेको बताउँछन् अर्का व्यापारी विजय चौधरी । विभिन्न प्रकारका पाइने भएकाले विद्युतीय बत्तीमा ग्राहकको आकर्षण बढेको कालिन्चोक इलेक्ट्रोनिक्स सपका देवेन्द्र श्रेष्ठले बताए । गुलावको फूल, पाला, फलफूल स्टाइलका बत्तीको माग बढी छ ।  उनले तिहारका लागि भनेर ३० लाखको विद्युतीय बत्ती ल्याएका छन् । 

उपत्यकामा कति विद्युतीय बत्ती तिहारमा भित्रिन्छन् भन्ने यकिन तथ्यांक नभए पनि करिब ३ करोड बराबरको भित्रिने व्यापारीको अनुमान छ । नेपालमा भारत र चीनबाट यस्ता बत्ती आउने गर्छन् । भारतीय अलि महँगो हुने भएकाले चिनियाँ बढी बिक्री हुने गरेको छ ।