काठमाडौं । पाकिस्तानको संघीय जाँच एजेन्सी (एफआईए)ले नेसनल ज्योग्राफिक म्यागाजिनको कभरमा फोटो प्रकाशित भएपछि लोकप्रिय बनेकी अफगान शरणर्थी महिला शर्बत गुलालाई पाकिस्तानको नक्कली पहिचानपत्र बनाएकोे आरोपमा गिरफ्तार गरेको छ ।

बीबीसीले जनाएअनुसार एफआईए स्रोतले शर्बतलाई गिरफ्तार गरेको पुष्टि गरेको तर उनका परिवारका अन्य सदस्य भागेको बताइएको छ ।

पाकिस्तानले गैरकानुनी रूपमा रहेका अफगानिस्तानीहरुलाई लक्षित गरी व्यापक अनुसन्धान गरेको थियो । शर्बत एक अफगान नागरिक भएको तथा उनले आफ्नो परिवारको फर्र्जी पहिचानपत्र बनाएको एफआईएले आरोप लगाएको छ ।

उनको विरुद्ध दुई वर्षअघिदेखि जाँच सुरु गरिएको बताइएको छ । तर सबुत नपुगेकाले कारबाही भएको थिएन । शर्बत गुला सन् १९८४ अफगान युद्धको समयमा परिवारका साथ पाकिस्तान आएकी थिइन् र शरणार्थी शिविरमा बसेकी थिइन् । 

जब नेसनल ज्योग्राफीले सन् १९८५ जुनमा आफ्नो कभरमा उनको तस्बिर छाप्यो, तब उनले अतर्राष्ट्रिय स्तरमा चर्चा कमाइन् । त्यतिबेला उनी १२ वर्षकी थिइन् । नेशनल ज्योग्राफिका लागि उक्त तस्बिर खिच्ने फोटोग्राफर स्टिब म्याककरी थिए ।

यो तस्बिर छापिएपछि शर्बत गुला सन् २००२ सम्म गायब भएकी थिइन् । शर्बत गुलाका हरिया आँखा भएका कारण नेशनल ज्योग्राफिक च्यानलले सन् २००२ मा एक वृत्तचित्र बनाएको थियो ।