काठमाडौं ।  काठमाडौं उपत्यकाका विभिन्न स्कुल अगाडि बम राख्ने दुई जनालाई प्रहरीले सार्वजनिक गरेको छ ।

पक्राउ पर्नेमा शंकर लाखे र चन्द्र बहादुर तामाङ रहेका छन् । घटनाका मूख्य योजनाकार मीन देवकोटा र सुमन श्रेष्ठको खोजी भइरहेको प्रहरीले जनाएको छ । 

माओवादी कम्युनिष्ट केन्द्र नेपालको भ्रातृ संगठन मोर्चाको रुपमा क्रियाशिल अखिल नेपाल स्वतन्त्र विद्यार्थी केन्द्र र योङ्ग कम्युनिष्ट फोर्सको संलग्नतामा बम राखिएको प्रहरीले जनाएको छ । मंगलबार विहानै सो समूहले काठमाडौं र ललितपुरका ८ वटा स्कुल अगाडि बम राखेर जनजीवन त्रसित पारेको थियो ।

सो संगठन शान्ति प्रक्रिया पूर्व २०६२ सालमै हतियारसहित भागेका पूर्व लडाकुहरुले गठन गरेको प्रहरीले जानकारी दिएको छ ।  महानगरीय आयुक्तको कार्यालयमा मंगलबार पत्रकार सम्मेलन गरी पक्राउ परेका दुई जनालाई सार्वजनिक गरेको हो ।

पत्रकार सम्मेलनमा एआईजी प्रताप थापाले राजनीतिक आवरणमा अपराध गरिएको बताए ।  उनले यस्तो आपराधिक क्रियाकलाप गर्ने कसैलाई पनि छुट नभएको बताउँदै जनजीवन त्रसित पारेर चन्दा उठाउन सक्रिय समूह रहेको बताए ।

पत्रकार सम्मेलनमा काठमाडौं प्रहरी प्रमुख एसएसपी विक्रम सिंह थापाले उक्त संगठनले २०६९ सालदेखि राजनीतिक दलको आवरणमा आपराधिक क्रियाकलाप गर्दै आएको अनुसन्धानबाट खुलेको बताए ।

“२०६२ सालदेखि ०६९ सालसम्म राजनीतिक दलको आवरणमा विभिन्न आपराधिक कृयाकलापमा संलग्न रहेका र त्यसपछि सरकारसँग गरेको वार्ता पनि सफल हुन नसकेको पाइयो,”थापाले पत्रकार सम्मेलनमा भने ।

त्यसपछि संविधान निर्माणका क्रममा आनन्द प्रसाद ढुंगानाको नेतृत्वमा रहेको वार्ता समितिसँग  २०७१  भदौमा नेपालगंजमा वार्ता गरेर हतियार बुझाएका थिए ।  समिति समक्ष हतियार बुझाएको भए पनि उनीहरुले विभिन्न कलेज तथा विद्यालयमा अनियमितता भएको बहाना बनाई धम्काउने, चन्दा आतंक जारी राखेको प्रहरीले जनाएको छ । अनुसन्धान अधिकारीका अनुसार उनीहरुले चन्दाका लागि यसअघि नै स्कुलमा पत्र पठाएका थिए । चन्दा नदिएपछि बम राखेर त्रसित पारेको उनको भनाई छ ।  प्रहरीका अनुसार फरार रहेका दुई जनासँग पक्राउ परेकाको नियमित फोन सम्पर्क भएकाले उनीहरु पनि छिट्टै पक्राउ पर्नेछन् ।

सो समूह २०७१ सालमा कलंकीबाट मन बहादुर चदाराको यार्सागुम्वा लुट्ने कार्यमा संलग्न रहेको प्रहरीले जनाएको छ । पार्टीका अध्यक्ष देबेन्द्र महत, केशब दाहालसहित ४ जनालाई जबरजस्ती चोरी मुद्दा काठमाडौं परिसरबाट चलाइएको थियो ।  त्यसैगरी गत साउन ६ गते पनि नेपाल मोडर्न स्कुलको बसमा पनि सोही समूहले आगजनी गरेको प्रहरीले जनाएको छ ।