पोखरा । नेपाली कांग्रेसका महामन्त्री गगन थापा पोखरा आएको विषयलाई राष्ट्रिय स्वतन्त्र पार्टी (रास्वपा)का नेताकार्यकर्ता सशंकित भएका छन् । तर, रास्वपाले अफवाह फैलाएको कांग्रेसको आरोप छ ।

हिजो साँझदेखि नै अनेक हल्ला चलाएको र आज पार्टी कार्यालयमा भेटघाट गरिरहँदा पनि असहज स्थिति सिर्जना गर्न खोजेको गण्डकी प्रदेशका कांग्रेस सांसद डिल्लीराम सुवेदीले बताए । उनका अनुसार, थापाले सहकारी पीडितसँग समेत अदालतमा विचाराधीन मुद्दा भएकाले अहिले आफू भेट्न नसक्ने बताएका थिए । 

"सहकारी पीडितले पनि भेट्न खोजेका थिए । तर, महामन्त्रीज्यूले अदालतमा विचाराधीन मुद्दा रहेकाले भेट्न नसक्ने बताउनुभयो । जे गर्छन, वकिलले गर्छन् भनेर जवाफ दिनुभयो । रास्वपाका कार्यकर्ताहरूले अफवाह फैलाएर अदालतलाई प्रभावित पार्ने पर्यत्न गर्न खोजेको जस्तो लाग्यो," सुवेदीले भने ।

कांग्रेस नेताहरू महामन्त्री थापा नितान्त पार्टी कार्यक्रममा आएको बताउँछन् । तर, रास्वपाका कार्यकर्ताले लामिछानेको मुद्दासँग जोडेर अनावश्यक चर्चा चलाएको उनीहरूको भनाइ छ ।

सहकारी प्रकरणमा रास्वपाले महामन्त्री थापालाई जोड्न सक्ने ठानेर कास्की कांग्रेसका सभापति किशोरदत्त बरालले कार्यतालिका नै सामाजिक सञ्जालमार्फत सार्वजनिक गरेका थिए । 

त्यसका बाबजुद पार्टी कार्यालयमा पूर्वनिर्धारित कार्यक्रममा थापा व्यस्त रहेका बेला बाहिरपट्टि रास्वपाका कार्यकर्ता, सहकारीपीडित र नेविसंघका नेता कार्यकर्ताबीच केहीबेर धकेलाधकेलको स्थिति सिर्जना भएको थियो । तर, यसबारे महामन्त्री र आफू अनभिज्ञ रहेको सभापति बराल बताउँछन् ।

महामन्त्री थापा पार्टी कार्यालयमा रहँदा सहकारीपीडित भन्दै एक महिला आएकी थिइन् । तर, उनी रास्वपा निकट रहेको स्वयं सहकारी पीडितले नै खुलाएका छन् ।

सूर्यदर्शन सहकारीपीडित संघर्ष समितिका अध्यक्ष किरण श्रेष्ठ भन्छन्, “अनुराधा श्रेष्ठ वडा नम्बर ६ की सदस्यलाई सबै पीडित नै हौँ भनेर संघर्ष समितिमा राखियो, बोल्न सिकाइयो । तर, अहिले रङ देखाइन् ।”

रास्वपाका केही कार्यकर्ता पार्टी कार्यालय गएपछि सहकारीपीडित पनि पुगेका थिए । दुई वर्षसम्म आफ्नै रकम खर्च गरेर दुई वर्षयता संघर्षमा आफूहरू उत्रिएको उनीहरूले बताए ।

“म गगनसँग प्रमाण माग्न आएको हो,” एक सहकारी पीडितले भनिन, “रोएर हुँदैन, हामीले संघर्ष गर्न अझै बाँकी छ ।”

यही क्रममा रवि समर्थित सहकारीपीडित र संघर्ष समिति बनाएका सहकारी पीडितबीच हात हालाहालको स्थिति सिर्जना भएको थियो ।