एजेन्सी । घरेलु टिम श्रीलंकाले दक्षिण अफ्रिकासँगको दुई खेलको टेष्ट क्रिकेट शृङ्खला जितेको छ । दोस्रो टेष्ट खेलमा दक्षिण अफ्रिकालाई १९९ रनले पराजित गर्दै श्रीलंकाले सिरिज २–० ले जितेको हो । ४९० रनको लक्ष्य पछ्याउँदै दोस्रो इनिङ्स थालेको दक्षिण अफ्रिकाले तेस्रो दिन नै सबै विकेटको क्षतिमा २९० रन मात्रै बनाउन सक्यो ।

दक्षिण अफ्रिकाका लागि थेउनिस डे ब्रुयनले अविजित १०१ रन बनाए । त्यस्तै, टेम्बा बाभुमाले ६३ र डेयन इल्गरले ३७ रन बनाए । बलिङतर्फ श्रीलंकाका रंगना हेराथले धारिलो बलिङ गर्दै ६ विकेट लिए । आफ्नो पहिलो इनिङ्समा खराब प्रदर्शन गर्दै दक्षिण अफ्रिकाले सबै विकेटको क्षतिमा १२४ रन मात्रै बनाउन सकेको थियो ।

यसअघि श्रीलंकाले २७५ रनमा ५ विकेटको गुमाउँदा आफ्नो दोस्रो इनिङ्सको समाप्तिको घोषणा गरेको थियो । श्रीलंकाले आफ्नो दोस्रो इनिङ्स समाप्तिको घोषणा गरेसँगै दक्षिण अफ्रिकाले ४९० रनको चुनौति पाएको थियो । दोस्रो इनिङ्समा श्रीलंकाका दिमुथ करुनारत्नेले ८५ र एन्जेलो मेथेवस पनि ७१ रन बनाए । त्यस्तै, दनुश्का गुनाथिलकाले ६१ रन बनाए । यसअघि पहिलो इनिङ्समा श्रीलंकाले ३३८ रन बनाएको थियो ।