एजेन्सी । विश्वकप फुटबलको प्रिक्वाटरफाइनलमा बेल्जियमविरुद्ध जापानले दोब्बर अग्रता बनाएको छ । जापानले दोस्रो हाफमा गोल गर्दै बेल्जियमविरुद्ध २–० गोलको अग्रता बनाएको हो ।

जापानका लागि जेन्की हरागुचीले खेलको ४८औं मिनेटमा गोल गर्दै अग्रता दिलाएका थिए । उनले सुन्दर गोल गरेका थिए । त्यसको ४ मिनेटपछि खेलको ५२औं मिनेटमा टाकासी इनुइले गोल गर्दै जापानलाई २–० गोलको अग्रता दिलाएका हुन् । जापानले उत्कृष्ट प्रदर्शन गर्दै ४ मिनेटभित्र अर्को गोल गर्न सफल भएको हो ।

पहिलो हाफमा भने दुबै टिमले गोलरहित बराबरी खेलेका थिए । बेल्जियमले गोल गर्ने थुप्रै अवसर खेर फालेपछि पहिलो हाफसम्म गोल गर्ने अवसर गुमाएको थियो । सुरुवाती समयदेखि नै बेल्जियमले बल नियन्त्रणमा लिएको थियो ।

रसियाको रोस्टोभ एरिनामा जारी खेलमा जापानलाई पराजित गर्दै विश्वकपमा आफ्नो अपराजित यात्रालाई निरन्तरता दिने लक्ष्यमा बेल्जियम रहेको छ । यता, जापान पनि बेल्जियमलाई पराजित गर्दै विश्वकपको क्वाटरफाइनलमा पुग्ने लक्ष्यमा छ ।