काठमाडौं । गत माघ ७ गते त्रिभुवन अन्तराष्ट्रिय विमानस्थलबाट चुडामणि उप्रेती ‘गोेरे’ले भित्र्याएको भनिएको ३३ किलो सुन अझै पत्ता लागेको छैन । गृह मन्त्रालयका सहसचिव ईश्वरराज पौडेलको नेतृत्वमा गठित समितिले अनुसन्धान जारी राखेको छ । पक्राउ परेका २९ जनाविरुद्ध मोरङ जिल्ला अदालतमा बहस जारी छ । तर, दुबईबाट आएको भनिएको ३३ किलो सुन कहाँ छ भन्ने आमचासो छ ।

हराएको भनिएको तस्करीको ३३ किलो सुन नभेटिँदा अदालतमा जारी मुद्दा कमजोर पर्छ कि भन्ने विश्लेषण पनि हुँदै आएको छ । ३३ किलो सुन प्रकरणसँगै जोडिएका उप्रेतीका लेखा सहयोगी सनम शाक्यको हत्यासँगै विमानस्थलका कर्मचारी प्रेमनारायण चौधरीले प्रहरी हिसासतमै आत्महत्या गरे । थाई एयरवेजका कर्मचारी सानु वनको दुर्घटनामा भएको मृत्युलाई पनि सुन प्रकरणसँगै जोडेर हेरिएको छ । अनुसन्धान समितिका एक सदस्यका अनुसार हराएको भनिएको ३३ किलो सुनको नजिक अनुसन्धान पुगिसकेको छ । ती सदस्यले भने, “हराएको सुन कसले किने, कसले लगे भन्ने सूचनासम्म आइसकेको छ । ढिलोचाँडो प्रमाणसहितको तथ्य बाहिर ल्याउँछौं ।” 

प्रहरीले सुन प्रकरणमा भुजुङ गुरुङका चालक लक्षुबहादुर गुरुङलाई पक्राउ गरेको छ । लक्षुलगायतको समूहले सुन गायब पारेको बताइएको छ । पक्राउ परेका लक्षुले सुन कसलाई बेचियो भन्नेसम्मको बयान अनुसन्धान समितिलाई दिएको समितिका एक सदस्यले बताए । लक्षुमाथि अनुसन्धान जारी छ । 

गृहको अनुसन्धान समितिले गोरेकै योजनामा ३८ सय किलो सुन नेपाल भित्रिएको निष्कर्ष निकालेको छ । नेपालमा ०७२ को भूकम्पपछि गोरेको सुन तस्करी फस्टाएको समितिले दाबी गरेको छ । २०७२ पछि त्रिभुवन विमानस्थलमा कार्यरत पूर्व र बहालबाला प्रहरी अधिकारीमाथि पनि मोरङ अदालतमा मुद्दा चलिरहेको छ । 

हुण्डी र सुनमा लगानी गर्नेको खोजी
चुडामणि उप्रेतीलाई रेडकर्नर नोटिस जारी गरेर खोजी कार्य जारी छ । समितिका सदस्यका अनुसार एक चरणको अनुसन्धानपछि अहिले समिति दोस्रो चरणको अनुसन्धानमा छ । यो अनुसन्धानमा विभिन्न निकायको सहयोग लिइएको छ । अहिले समितिले हुण्डीवाला र सुनमा लगानी गर्नेहरुको कनेक्सन खोतलिरहेको ती सदस्यले बताए ।

उनका अनुसार अवैध सुन तस्करीमा केही चर्चित व्यापारीलगायतको संग्लनता देखिएको छ । अहिले समितिको मुख्य काम भनेकै गोरेलगायत फरार अभियुक्तहरुको खोजी, हुण्डीवाल र सुनमा लगानी गर्नेहरुकै भएको उनले बताए । 

मध्यरातसम्म समिति काममा, म्याद थप्ने तयारी
गृहका सहसचिव पौडेल नेतृत्वको समितिको म्याद जेठ ४ गते सकिँदैछ । गत सातामात्रै प्रधानमन्त्री र गृहमन्त्रीले बालुवाटारमै बोलाएर समितिलाई घटनाको अनुसन्धानमा पूर्ण सहयोग रहेको बताउँदै म्याद थप गर्नसक्ने बताएका थिए । समितिका सदस्यहरुले बालुवाटारमा मध्यरातसम्म प्रधानमन्त्री, गृहमन्त्री, गृहसचिव, आइजीपीलगायतलाई ३३ किलो सुनसँगै गोरेले आजसम्म भित्र्याएको सुनको नालीबेली सुनाएका थिए । अनुसन्धान जारी रहेको र अझै केही समय लाग्ने समितिको मागपछि प्रधानमन्त्री र गृहमन्त्री म्याद थप गर्न राजी भएका हुन् ।

समितिको म्याद २० दिन अझै थपिनसक्ने ती सदस्यले बताए । समितिले बिदाका दिन पनि अनुसन्धान जारी राखेको छ । समितिले प्रत्येक दिन बिहान ८ बजेदेखि राती ११–१२ बजेसम्म काम गरिरहेको बताइएको छ । 

समितिका सदस्यका अनुसार प्रत्येक दिन बिहान सबैलाई काम र जिम्मेवारी बाँडफाँड गरिन्छ । त्यसपछि त्यसको प्रगति रिर्पोटिङ, कसलाई समात्नेलगायतका विषयमा छलफल हुन्छ । 

गोरे पक्राउ नपर्दा राजनीतिक संग्लनता पुष्टि गर्न गाह्रो
समितिका एक सदस्यका अनुसार मुख्य तस्कर भनिएका चुडामणि उप्रती ‘गोरे’ फरार छन् । समितिको पहिलो खोजीमा पनि गोरे नै छन् । यस्तोमा गोरे पक्राउ नपर्दासम्म अनुसन्धान पूर्ण नहुने उनले बताए ।

“कैयौं प्रमाण पत्ता लगाए पनि गोरे नसमातिदासम्म सबै कुरा बाहिर आउन गाह्रो छ,” ती सदस्यले भने । उनका अनुसार ३३ किलो सुन प्रकरणमा राजनीतिक नेताहरुको संलग्नताको चर्चा भए पनि ‘गोरे’ पक्राउ नपर्दा राजनीतिक संग्लनता पुष्टि गर्न गाह्रो छ । अनुसन्धानका क्रममा हालसम्म राजनीतिक नेताको संग्लनता नदेखिएको उनले बताए ।