काठमाडौं । ३३ किलो सुन प्रकरणको पहिलो चरणको अनुसन्धान सकेर मुद्दा मोरङ जिल्ला अदालतमा दर्ता भएपछि गृह मन्त्रालयका सहसचिव ईश्वरराज पौडेलको नेतृत्वमा बनेको विशेष समितिले दोस्रो चरणको अनुसन्धान सुरु गरेको छ ।

गायब भएको भनिएको ३३ किलो सुन तस्करी, सनम शाक्यसहित तीन जनाको मृत्यु प्रकरणमा समितिले पहिलो चरणको अनुसन्धान सकेपछि मुद्दा दायर गरिएको थियो ।

६३ जनाविरुद्धको मुद्दा अहिले मोरङ जिल्ला अदालतमा चलिरहेको छ । मुद्दाको सुनुवाई सुरु भएको छ । पहिलो चरणको अनुसन्धानबाट दोषी देखिएका अपराध महाशाखाका एसएसपी दिवेश लोहनीसहित २९ जनालाई मोरङ जिल्ला अदालतमा उपस्थित गराइएको थियो भने बाँकीलाई फरार भन्दै मुद्दा दर्ता गरिएको थियो ।

फरार चुडामणि उप्रेती ‘गोरे’लाई सुन तस्करको मुख्य नाइके बनाएर अदालतमा गएको मुद्दाबारे अहिले जिल्ला अदालतमा बयान लिने काम भइरहेको छ ।

प्रहरीले गोरेसहित ३४ लाई फरारको सूचीमा राखेको छ । बयानपछि उनीहरुलाई पुर्पक्षका लागि जेल चलान गर्ने, धरौटीमा रिहा गर्ने वा साधारण तारेखमा छाड्ने आदेश अदालतबाट हुनेछ । गत माघ ९ गते युएईबाट त्रिभुवन विमानस्थल हुँदै नेपाल भित्रिएकोे ३३ किलो सुन हराएको भन्दै गोरेले नै प्रहरीलाई सूचना दिएका थिए । त्यही घटनासँग जोडेर गोरेका पूर्व लेखा सहयोगी सनम शाक्यको फागुन १८ मा हत्या भएको थियो ।

सनम शाक्य हत्या र ३३ किलो सुन प्रकरणमा चुडामणि उप्रेती ‘गोरे’ लाई मुख्य अभियुक्त बनाएर बहालवाला एसएसपी, पूर्वडीआईजी, बहालवाला एसपी र डीएसपीसहित ६३ जनाविरुद्ध जिल्ला अदालत मोरङमा मुद्दा दर्ता भएसँगै छानविन समितिले दोस्रो चरणको अनुसन्धान सुरु गरेको छ ।

गृह मन्त्रालयले बनाएको विशेष समितिका एक सदस्यले बाह्रखरीसँगको कुराकानीमा आफूहरु दोस्रो चरणको अनुसन्धानमा प्रवेश गरिसकेको जानकारी दिए ।

उनले अब गोरेको राजनीतिक सम्बन्धका बारेमा अनुसन्धान गरिने जनाएको छ । दोस्रो चरणको अनुसन्धान गोरेदेखि राजनीतिक दलका नेतासम्म केन्द्रित हुने स्रोतले जानकारी दिएको छ ।

छानबिन समितिका ती सदस्यले बाह्रखरीसँगको कुराकानीमा भने– हामीले पहिलो चरणको अनुसन्धान टुङग्याएर दोस्रो चरणको अनुसन्धान सुरु गरिसकेका छौं । अब गोरेको खोजीदेखि उनको राजनीतिक कनेन्कसन, आर्थिक लेनदेन, रकम ओसार्ने बाटो लगायतमा अब हामी केन्द्रित हुनेछौं । अहिलेसम्मको अनुसन्धानले गोरेको साँठगाँठ अरु कसैसँग हुने गरेको आशंका छ ।”

उनका अनुसार अब हुन्डीको कारोबारी, प्रहरीका पूर्व विशिष्ट अधिकारी लगायत पनि अनुसन्धानको घेरामा आउन सक्छन् । उनले आफुहरुले गरेको अनुसन्धानले प्रहरीभित्र रहेको फोहर भंगालो सफा भएको र अब अन्य क्षेत्रका तस्करहरुको पनि पर्दाफास हुने उनको दाबी छ ।

“प्रधानमन्त्री र गृहमन्त्रीले नै हामीलाई बाहिर केही पनि नबोल्न भन्नुभएको छ, हामीले पत्रकार सम्मेलन गरेको दिनमा अझै धेरै कुरा बाहिर आउनेछ,” ती सदस्यले बाह्रखरीसँग भने, । उनले कतिपय पूर्व प्रहरी अधिकारीहरुले अदालतमा प्रवेश गरिसकेको विषयमा पनि प्रश्न उठाएको भन्दै आपत्ति जनाए ।

उनले समितिले गरेको निष्पक्ष छानबिनमा आशंका नगर्न पनि अनुरोध गरे । ३३ किलो सुन प्रकरण कसरी बाहिर सार्वजनिक भयो ?

३३ किलो सुन र सनम हत्या प्रकरणमा मुख्य अभियुक्त गोरे, एसएसपी श्याम खत्री लगायत ३४ जना अझै पनि फरारको सूचीमा छन् । ३३ किलो सुन विमानस्थलबाट बाहिरिएर हराएपनि गोरेको समुहले आफ्ना पूर्वकर्मचारी सनम शाक्यलाई समाते । सनमलाई यातना दिँदादिँदै फागुन १८ मा उनको मृत्यु भएपछि गोरेले घटना मिलाउन महानगरीय अपराध महाशाखाका सइ बालकृष्ण सञ्जेललाई खबर गरे । त्यसछि अपराध महाशाखाका एसएसपी दिवेश लोहनीले डिएसपी प्रतिज केसी र सइ सञ्जेललाई विराटनगर पठाएका थिए ।

तर यो कुरा उनले आफ्नो उपल्लो निकाय महानगरीय प्रहरी आयुक्तको कार्यालयलाई जानकारी नगराएको भन्दै उनीमाथि नै अनुसन्धान सुरु गरिएको थियो ।

फाइल तस्बिर