काठमाडौं । तस्करीको ३३ किलो सुन हराएको तथा सनम शाक्यको हत्या प्रकरणमा प्रहरी अपराध महाशाखाको टोली माथिल्लो तहको अनुमति नै नलिई विराटनगर पुगेको खुलेको छ । ‘चेन अफ कमाण्ड’ मिचेर महानगरीय अपराध महाशाखाका एसएसपी दिवेश लोहनीको निर्देशनमा प्रहरी टोली आफूखुसी विराटनगर पुगेको खुलेको हो ।

अपराध महाशाखा महानगरीय प्रहरी आयुक्तको कार्यालय रानीपोखरी मातहतमा छ र यसको कार्यक्षेत्र ललितपुर, काठमाडौं र भक्तपुर हो । महाशाखाले कुनै पनि काम गर्दा महानगरीय कार्यालय रानीपोखरीको अनुमति लिनुपर्छ । 

एआईजी जयबहादुर चन्दले अपराध महाशाखा आफ्नो कार्यालय मातहत रहेको बताउँदै सनम शाक्य हत्यापछि महाशाखाको टोली विराटनगर गएको बारे आफूलाई जानकारी नभएको बताएका छन् । उनले भने, “महाशाखाको कार्यक्षेत्र काठमाडौं उपत्यकामात्रै । विशेष अवस्थामा महानगरीय प्रहरी कार्यालय रानीपोखरी र त्यसपछि प्रहरी प्रधान कार्यालयको अनुमतिमा मात्रै अन्यत्र जान मिल्छ ।” 

स्रोतका अनुसार महाशाखाका एसएसपी लोहनीले यसबारे प्रहरी महानिरीक्षक प्रकाश अर्याललाई समेत जानकारी गराएका थिएनन् । प्रायः देशभर र विदेशका विवादित विषयमा केन्द्रीय अनुसन्धान व्युरो ‘सिआईवी’ले अनुसन्धान गर्ने गर्छ । उच्च एक प्रहरी अधिकारीले भने, “यो विषयमा पनि सिआइवीले अनुसन्धान गर्नुपथ्र्यो तर महाशाखाले आफूखुसी गर्न खोज्यो ।” 

गृह मन्त्रालयले तस्करीको ३३ किलो सुन गायब र त्यही प्रकरणमा मोरङ उर्लाबारीका सनम शाक्यको ‘हत्या प्रकरण’मा शंकास्पद भूमिका देखिएको भन्दै महाशाखाका एसएसपी दिवेश लोहनीसहित तीन सुरक्षा अधिकारीलाई प्रहरी प्रधान कार्यालयमा तान्न निर्देशन दिएको छ । 

गृहको निर्देशनपछि एसएसपी लोहनी, डिएसपी प्रजित केसी र प्रहरी नायब निरीक्षक (सई) बालकृष्ण सञ्जेल प्रहरी प्रधान कार्यालयमा झिकाइएका छन् । स्रोतका अनुसार यो प्रकरणमा महाशाखाका अन्य तल्लोदेखि माथिल्लो दर्जाका अधिकारी पनि अनुसन्धानको दायरामा छन् । 

फागुन पहिलो साता चुडामणि उप्रेती ‘गोरे’ ले चीनको केरुङ नाका हुँदै ल्याएको ३३ किलो सुन भरियाले लुकाएको भन्दै गत फागुन १८ गते सनम शाक्यको हत्या भएको थियो । हत्यापछि यो प्रकरण झनै रहस्यमय बनेको थियो । हत्या गरिएका शाक्यको शव फागुन १९ गते विराटनगरको पोखरीयाबाट अपराध महाशाखाका डिएसपी प्रजित केसी र प्रहरी नायब निरीक्षक (सई) बालकृष्ण सञ्जेलसमेतको टोलीले बरामद गरेको थियो । 

३३ किलो सुन र सनम हत्या प्रकरण अनुसन्धान गर्न अपराध अनुसन्धान विभागका डिआईजी पुष्कल रेग्मीको नेतृत्वमा छानविन समिति गठन भएको थियो । समितिमा गृह मन्त्रालयका सहसचिव ईश्वरराज पौडेल, एसएसपी बसन्त लामा, विशेष ब्यूरोका डिएसपी सुदिप पाठक र केन्द्रिय अनुसन्धान ब्यूरोका इन्सपेक्टर भीष्म हुमागाई सदस्य छन् । 

यो समितिले चैत २० र २१ गते एसएसपी लोहनीसँगै डिएसपी प्रजित केसी र नायब निरीक्षक बालकृष्ण सञ्जेलसँग बयान लिइसकेको छ । यो घटनामा गृहमन्त्री रामबहादुर थापाले समेत चासो व्यक्त गरेका थिए ।