काठमाडौं । पाल्पाको उत्तरी क्षेत्रमा पर्ने बगनासकाली गाउँपालिका ८ मा अवस्थित विश्वकै ठूलो मानिएको शिवमूर्ति रहेकोे स्थान महामृत्युञ्जय शिवासनधाममा यही माघ २१ गते आइतबारदेखि फाल्गुण २ गतेसम्म धार्मिक अनुष्ठान एवं शिवपुराण तात्विक ज्ञान महायज्ञ हुने भएको छ । मेलाको सम्पूर्ण तयारी अन्तिम चरणमा पुगेको मेला आयोजक मूल समारोह समितिका संयोजक विष्णु बश्यालले जानकारी दिए । 

महायज्ञबाट स्वेच्छाले संकलित रकमबाट मन्दिर स्थापना गर्ने आयोजकको लक्ष्य रहेको छ । “५ वर्षअगाडि राखिएको शिवको मूर्तिको लागि अहिलेसम्म मन्दिर बनाउन सकिएको छैन । संकलित रकमबाट हामीले निर्माण प्रक्रियामा रहेको मन्दिरको काम पूरा गर्ने लक्ष्य राखेको छौं । त्यसबाहेक धर्मशाला तथा अखण्ड धुनीको स्थापना गर्ने गुरुयोजनाअनुसार काम हुनेछ,” संयोजक बश्यालले भने । ११ दिनसम्म हुने महायज्ञमा तीन लाख भक्तजनको उपस्थिती रहने आयोजकको अपेक्षा छ । 

शिवरात्रिको अबसरमा हुन लागेको धार्मिक महायज्ञमा भागवत वाचनसँगै पितृमोक्ष र राष्ट्रशान्तिको कामनासहित ११ करोड दिप प्रज्वलन, ११ लाख महामृत्युञ्जय मन्त्रजप तथा हवन कार्यक्रम, सवा लाख गायत्री मन्त्रजाप तथा हवन कार्यक्रम, रुद्री पाठ र हवन, दैनिक योग प्रशिक्षण, ज्योतिष तथा वास्तु परामर्श, सामूहिक व्रतबन्ध, विवाह, चौरासीलगायत कार्यक्रम हुने आयोजकले बताएको छ । 

महायज्ञका मूल बाचक पण्डित नेत्रप्रसाद पराजुली तथा संरक्षक स्वामी १००८ विवेकानन्द सरस्वती रहेको आयोजकले जानकारी दिएको छ । महायज्ञमा भक्तजनहरुको निःशुल्क आवतजावतका लागि ११ दिनसम्म तानसेनको नारायणस्थानदेखि यज्ञस्थलसम्म दैनिक २ वटा बसको व्यबस्थासमेत रहेको आयोजले जनाएको छ । 

बगनासकाली ८ बराङ्गदीका भीम बश्यालले महामृत्युञ्जय शिवासनधाम बनाउन २०७० सालमा १ करोड रुपैयाँभन्दा बढी रकम खर्च गरी तामा र पित्तलको शिवमूर्ति निर्माण गरी धाममा राख्न लगाएका थिए ।