काठमाडौं । अख्तियार दुरुपयोग अनुसन्धान आयोगले मधेस प्रदेशका सांसद सरोजकुमार सिंहका स्वकीय सचिव विनोदकुमारलाल कायस्थलाई नियन्त्रणमा लिएको छ ।

टंगालस्थित अख्तियारको कार्यालयबाट खटिएको टोलीले उनलाई सोमबार धनुषाको जनकपुरधाम उपमहानगरपालिकाबाट पक्राउ गरी नियन्त्रणमा लिएको हो । उनीमाथि थप अनुसन्धान भइरहेको अख्तियारद्वारा मंगलबार जारी विज्ञप्तिमा उल्लेख छ ।

“निज मधेस प्रदेशसभा सदस्य सरोजकुमार सिंहको साथमा रहेको निजले प्रयोग गरी आएको विद्युतीय उपकरण समेत कब्जामा लिई आवश्यक अनुसन्धान प्रक्रिया अगाडि बढाइएको छ,” अख्तियारले विज्ञप्तिमा भनेको छ ।

मधेस प्रदेशका सांसद सिंह समेतले विभिन्न उपभोक्ता समितिहरू गठन गरेको, समितिका खातामा दाखिला भएको रकम आफ्नो निजी सचिव कायस्थमार्फत झिक्न लगाई आफ्नो र श्रीमतीको खातामा राखेको भन्ने उजुरी परेपछि अख्तियारले अनुसन्धान अघि बढाएको हो ।

अनुसन्धान गर्ने क्रममा अख्तियारको टोलीले कायस्थलाई नियन्त्रणमा लिएको हो ।