काठमाडौं । विभागीय टोली त्रिभुवन आर्मी क्लबले अन्तर्राष्ट्रिय आमन्त्रण लुम्बिनी कप महिला फुटबल प्रतियोगितामा विजयी सुरुवात गरेको छ । शुक्रबार बाँके नेपालगन्ज रंगशालामा भएको उद्घाटन खेलमा आर्मीले सुदूरपश्चिम प्रदेश फुटबल संघलाई ३–० ले हरायो । 

आर्मीको जितमा अनिता लम्जेलले दुई तथा हेमा चौधरी र तुलसा बोहराले समान एक गोल गरेका थिए । खेलको प्लेअर अफ दी म्याच आर्मीकै अनिता घोषित भइन् ।  

जितपछि आर्मी सेमिफाइनलमा प्रवेश गरेको छ । अब, आर्मीले फाइनल प्रवेशको लागि अर्को विभागीय टोली नेपाल पुलिस क्लब र भारतको सिलगुडी फुटबल संघको विजेतासँग वैशाख ९ गते खेल्नेछ । यस्तै पुलिस र सिलगुडीबीच शनिबार प्रतिस्पर्धा हुनेछ ।  

आर्मी फागुन अन्तिम साता इलाममा भएको महिला गोल्डकप र चैतमा चितवनमा भएको प्रतियोगितामा दोस्रो भएको थियो । आफ्ना तीन महत्त्वपूर्ण खेलाडी दीपा शाही, अमिषा कार्की र विमला चौधरीविना मैदान उत्रिएको आर्मीले पहिलो हाफमा मात्र एक गोल गरेको थियो । 

चक्र तामाङको प्रशिक्षणमा रहेको आर्मीलाई सुरुवाती अग्रता अनिताले चौथो मिनेटमै दिलाइन् । विमला विकले फ्रिकिकलाई सुदूरपश्चिमकी गोलकिपर सुनौना चौधरीले नियन्त्रण लिन नसकेको फाइदा अनिताले लिँदै सिक्स यार्ड बक्सबाट गोल गरेकी हुन् । 

५१औँ मिनेटमा आर्मीले दोस्रो गोल थप्यो । प्राप्त फ्रिकिकलाई अनिताले सुन्दर गोलमा परिणत गरिन् । पूर्णिमा टाडीले १८ यार्ड बक्सनजिकै बल हातले छोएपछि रेफ्री कृति सेनले आर्मीलाई फ्रिकिक अवसर दिएकी हुन् । 

चार मिनेटपछि नै आर्मीले तेस्रो गोल गरेको हो । यसपटक हिमा चौधरीले गोल गरिन् । शर्मिला थापाले मिलाएको बललाई अगाडि बढाउँदै हेमाले पेनाल्टी क्षेत्रबाट सुन्दर गोल गर्दै आर्मीलाई सहज अवस्थामा पुर्‍याएकी थिइन् । 

७७औँ मिनेटमा आर्मीले अग्रता ४–० को बनायो । यसपटक वैकल्पिक खेलाडी तुलासाले गोल गरेकी हुन् । सुदूरपश्चिमका खेलाडीले क्लियर गर्न नसकेको बललाई तुलसाले बक्स बाहिरबाटै सानदार गोल गरिन् । उनको शक्तिशाली प्रहार सुदूरपश्चिमकी गोलकिपर सुनौनासँगै डिफेन्डरले रोक्न सकेनन् । 

पहिलोपटक आयोजना भएको लुम्बिनी कपमा आठ टोली सहभागी छन् । घरेलु टिम बाँके–११, सशस्त्र प्रहरी बलको एपीएफ, नेपाल पुलिस क्लब, त्रिभुवन आर्मी क्लब, कर्णाली प्रदेश फुटबल संघ , सुदूरपश्चिम प्रदेश फुटबल संघ, रौतहट जिल्ला फुटबल संघ र भारतको सिलगुडी फुटबल क्लबले उपाधिका लागि प्रतिस्पर्धा गरिरहेका छन् । 

बाँके जिल्ला फुटबल संघको सहकार्यमा भएकोे प्रतियोगिताको विजेताले ५ लाख ५ हजार ५५५ रुपैयाँ र उपविजेताले २ लाख ५० हजार रुपैयाँ, ट्रफी, मेडल प्राप्त गर्नेछन् । 

हरेक खेलका ‘प्लेयर अफ द म्याच र प्रतियोगितामा विधागततर्फ उत्कृष्ट हुनेलाई पनि पुरस्कृत गरिने आयोजक अन्तरालले जनाएको छ ।