काठमाडौं । चलचित्र ‘के घर के डेरा : घर नं २’ले एकसाथ तीनवटा पोस्टर रिलिज गरेको छ । तीनवटा पोस्टर रिलिज गर्दै प्रदर्शन मिति परिवर्तन गरेको छ ।

जेठ २ मा रिलिज हुने चलचित्रका तीन पोस्टरमध्ये एउटामा निश्चल बस्नेतलाई प्रस्तुत गरिएको छ । निश्चललाई कतै पुग्न हतार भएझैँ देखिन्छ । 

दोस्रो पोस्टरमा अर्का अभिनेता खगेन्द्र लामिछाने तथा अभिनेत्री उपासना सिंह ठकुरी छन् । उनीहरू रोमान्टिक शैलीमा देखिन्छन् ।

तेस्रो पोस्टरमा सिनेमाका अधिकांश मुख्य पात्र अटाएका छन् । यो पोस्टरले सिनेमाको नामलाई बोकेको छ । डेरामा बसेर काठमाडौं चिहाइरहेको देखाइएको छ । डेरामा खुम्चियर बसेका व्यक्तिले देखिरहेको फराकिलो सपना यो पोस्टरले देखाएको छ । 

यो चलचित्रलाई ‘कर्नाली ब्लुज’, ‘एक्लो’, ‘फिरफिरे’जस्ता उपन्यासका लेखक बुद्धि सागरले लेखेका हुन् । दीपेन्द्र के खनालले निर्देशन गरेका छन् । 

कृष्णबहादुर थापाको छायांकन रहेको छ । नकिम उद्दिन, शरद श्रेष्ठ तथा किरण महर्जनको निर्माता रहेको सिनेमामा युवराज कार्की कार्यकारी निर्माता छन् ।

चलचित्रमा आर्यन सिग्देल, खगेन्द्र लामिछाने, निश्चल बस्नेत, केकी अधिकारी, उपासना सिंह ठकुरी, प्रकाश घिमिरे, श्रृजना नापित, संजोग रसाइली, रुविना घिमिरेलगायत कलाकारको मुख्य भूमिका रहेको छ ।