काठमाडौं । सहिद स्मारक ‘बी’ डिभिजन लिगमा च्यासल युथ क्लबले मध्यपुर युथ एसोसिएसनविरुद्ध फराकिलो जित निकालेको छ । मंगलबार सातदोबाटोस्थित एन्फा मुख्यालयमा सम्पन्न पहिलो खेलमा च्यासलले मध्यपुरविरुद्ध ४–० को फराकिलो जित निकालेको हो ।

च्यासलले चारै गोल दोस्रो हाफमा गरेको हो । च्यासलका अविनाश थारूले ५६औँ मिनेटमा गोल गरेर टोलीलाई अग्रतामा राखे । ६०औँ मिनेटमा निरज कार्कीले अग्रता दोब्बर बनाए । ८८औँ मिनेटमा सुजन विश्वकर्माले गोल गर्दा च्यासलले अग्रतालाई ३–० मा पुर्‍याए । इन्जुरी टाइममा कुशल देउवाले अन्तिम गोल गर्दै च्यासलको सहज जित सुनिश्चित गरे ।

जवाफमा मध्यपुरले एउटा पनि गोल फर्काउन सकेन ।

जितसँगै चार खेलबाट सात अंक जोडेको च्यासल अंक तालिकाको तेस्रो स्थानमा उक्लिएको छ । पराजित मध्यपुर चार अंकसहित आठौँ स्थानमा झरेको छ ।