काठमाडौं । काठमाडौं जिल्ला अन्तरपालिका फुटबल प्रतियोगिता हुने भएको छ । बुधबार आयोजक जिल्ला समन्वय समिति काठमाडौंले पत्रकार सम्मेलन आयोजना गरी प्रतियोगिताको जानकारी दिएको हो ।

प्रतियोगिता चैत्र २ देखि ९ गतेसम्म सञ्चालन हुने जनाएको छ । काठमाडौं जिल्लाभरका स्थानीय तहलाई समेटेर आयोजना गर्न लागिएको प्रतियोगितामा हालसम्म ६ वटा नगरपालिकाले सहभागी हुने बताएको जनाइएको छ । ११ मध्ये कम्तीमा आठवटासम्म नगरपालिकाको सहभागिता रहे लिग चरणमा र ११ वटै पालिकाको सहभागिता रहे नक आउट चरणमा सञ्चालन हुने जानकारी आयोजकले दिए ।

प्रतियोगितामा विजेता टोलीले दुई लाख रुपैयाँ र उपविजेता टोलीले एक लाख रुपैयाँ पुरस्कार प्राप्त गर्नेछन् । यस्तै, प्रतियोगिताको सर्वोत्कृष्ट खेलाडीले २५ हजार रुपैयाँ पाउने छन् । उत्कृष्ट गोलरक्षक र सर्वाधिक गोलकर्तालाई जनही १० हजार रुपैयाँ दिइनेछ ।

प्रतियोगिताको अनुमानित खर्च १० देखि १२ लाख रुपैयाँ छ । समितिका अनुसार, प्रतियोगिताका सबै खेलहरू हल्चोकस्थित सशस्त्र प्रहरी बलको खेलमैदानमा सञ्चालन हुनेछन् ।