काठमाडौं । धरानमा जारी प्रदेश प्रिमियर लिग फुटबल प्रतियोगिताअन्तर्गत आज भएको ‘सुपर लिग’का दुवै खेल बराबरी भएको छ ।

कोसी प्रदेश फुटबल संघको आयोजनामा भइरहेको सुपर लिगको पहिलो खेलमा पाँचथर युनाइटेड र खोटाङको बुइपा–११ ले एक–एक गोल गरे । खेलको ६३औँ मिनेटमा बुइपाका रवीन्द्र राईले गोल गरे भने खेलको अन्तिम मिनेटमा पाँथचरका सुशील लावतीले गोल फर्काए ।

खेलको ‘म्यान अफ दी म्याच’ बुइपाका प्रविन्द्र राई घोषित भए । राईले नगद पाँच हजार प्राप्त गरे । आजै भएको दोस्रो खेलमा धनकुटाको देउराली युथ क्लब र उदयपुरको गाईघाट फुटबल क्लब पनि गोलरहित बराबरी भए । उनीहरूले एक–एक अंक बाँडे । खेलको म्यान अफ दी म्याच देउरालीका विश्व लिम्बू घोषित भई नगद पाँच हजार पुरस्कार प्राप्त गरे ।

सुपर लिगमा प्रवेश गरेका चारै टिमबीच मंगलबार खेल हुनेछ । पाँचथर समूह ‘ए’बाट विजेता बन्दा गाईघाट समूह ‘बी’बाट विजेता बनेको छ । त्यसैगरी देउराली युथ क्लब समूह ‘सी’बाट विजेता बनेको छभने खोटाङ समूह ‘डी’बाट विजेता बन्दै सुपर लिगमा प्रवेश गरेको छ ।

प्रतियोगितामा ११ जिल्लाका लिग च्याम्पियन क्लबहरूबीच प्रतिस्पर्धा भएको थियो । यस प्रतियोगिताको विजेता र उपविजेता टिम राष्ट्रिय लिग छनोटका लागि हुने अन्तर प्रादेशिक लिगका लागि छनोट हुने छन् ।

प्रतियोगिताको विजेताले दुई लाख, उपविजेताले एक लाख ५० हजार, तेस्रो हुने टिमले  एक लाख २५ हजार र चौथो हुने टिमले रु एक लाख नगद पुरस्कार प्राप्त गर्ने कोसी प्रदेश फुटबल संघका अध्यक्ष किशोर राईले बताए ।