काठमाडौं । नेपाल बार एसोसिएसनको २७औँ महाधिवेशनबाट वरिष्ठ अधिवक्ता प्रा. डा. विजयप्रसाद मिश्र अध्यक्ष निर्वाचित भएका छन् । ३६ वर्ष लामो कानुनी अभ्यास र प्राध्यापनको अनुभव समेत भएका प्रा. डा. मिश्र लिगल प्रोफेसनमा विद्यावारिधी हुन् । कानुन अभ्यासकर्ता थुप्रै विद्यार्थी बनाएका मिश्रले नाम जस्तै हरेक उमेदवारीमा विजयी पहिचान पाएका छन् । बिहीबार अन्तिम परिणाम घोषणा भएर निर्वाचित भएपछि उनलाई बोल्ने समेत फुर्सद थिएन । फोन उठाएर उनी सबैलाई पहिलो वाक्य नै भनिरहेका थिए – ल है धन्यवाद !

सकेसम्म सबैको फोन उठाएर धन्यवाद ज्ञापन गरेका उनले बाह्रखरीसँग लामो कुरा गर्न नसक्ने अवगत गराए । “३६ वर्ष लामो वकालत अभ्यास र प्राध्यापनबाट बनाएको सम्बन्धलाई सबैले सम्मान गर्दै नेपाल बारको नेतृत्वमा पुर्‍याउन भूमिका खेलिदिनुभएको छ । सबैलाई धन्यवाद !,” मिश्रले भने, “अब मलाई अवसर र चुनौती दुवै आएको छ । यसलाई सबैको साथ र सहयोगबाट पार लगाउनुछ ।”

०००

नेपाल बार एसोसिएसनको ०६३–०६६ को कार्यकालमा एमालेनिकट विश्वकान्त मैनाली अध्यक्ष थिए । उक्त कार्यसमितिमा हाल मिश्रको प्रतिद्वन्द्वी बनेका रमन श्रेष्ठ महासचिव थिए । सधैँजस्तो नेपाल बारको नेतृत्व गरेको लोकतान्त्रिक समूह त्यो समयमा दर्शकदिर्घातिर परेको थियो । तर, ०६६–०६९ का लागि लोकतान्त्रिक कानुन व्यवसायीहरूको संगठन डेमोक्र्याटिक लयर्स एसोसिएसनले एकलौटी कार्यसमिति बनायो ।

डीएलको तर्फबाट उमेदवारी दिएका वरिष्ठ अधिवक्ता प्रेमबहादुर खड्काको एकल प्यानल बारको नेतृत्वमा निर्वाचित भएको थियो । त्यसबेला महासचिव निर्वाचित भएका थिए– हाल अध्यक्षमा निर्वाचित उनै विजयप्रसाद मिश्र ।

त्यसबेला बाँकी सबै संगठनका कानुन व्यवसायी मिलेर चुनाव लड्दा १७ सदस्यीय कार्यसमितिमा १७ जना नै डीएलएनिकट कानुन व्यवसायी निर्वाचित भएका थिए ।

०००

शालिन व्यक्तित्व बनाएका मिश्रको प्रभाव त्यसबेला सिंगो टिम जित्नुमा थियो भन्ने धेरैले स्वीकार गर्छन् । उनको अध्यक्ष भएर काम गरेका वरिष्ठ अधिवक्ता प्रेमबहादुर खड्का अहिले पनि सत्ताको प्रभावका कारण गठबन्धन बनेको भन्दै विजयप्रसादको नेतृत्वमा एकल समूह भएको भए अहिले पनि त्यस्तै अवस्था दोहोरिने बताउँछन् । त्यस्तो हुन नपाएकोमा उनी मिश्रले जितेर पनि पूरा खुसी हुन पाएका छैनन् ।

“उहाँ मेरो महासचिव हुँदा खेलेको भूमिका, प्राध्यापनमार्फत बनाएको छवि र सम्बन्ध तथा डीएलएका सदस्यहरूबाट एक्लै अध्यक्ष निर्वाचित हुने व्यक्तित्व हो,” पूर्वअध्यक्ष खड्काले भने, “तर, अहिले सत्तागठबन्धनको प्रभाव बारमा पर्‍यो । एक्लाएक्लै प्रतिस्पर्धा हुन पाएन र उहाँको जितको श्रेय गठबन्धनलाई गएको छ ।”

उनी डीएलएको संगठनमा अहिलेको गठबन्धनले नकारात्मक प्रभाव पारेको भन्दै यसले भोलिका दिनमा मिश्रलाई काम गर्न पनि समस्या हुनसक्ने बताउँछन् । अहिले गठबन्धन गरेकाहरूले भोलि काम गर्ने क्रममा संगठनको रंग देखाएमा मिश्रको व्यक्तित्वअनुसार काम हुनेमा उनी शंका व्यक्त गर्छन् । “उहाँको कानुनी अभ्यासमा विशेष पहिचान छ । प्राध्यापक बनिसक्नुभएको छ । विद्यावारिधी पनि राम्रै विषयमा गरिक्नुभएको छ । नेपाल बारमा महासचिव भएर एउटा व्यक्तित्व बनाइसक्नुभएको छ,” पूर्वअध्यक्ष खड्काले भने, “तर, चुनाव जित्न सँगै भएका अर्को संगठनका साथीहरूले भोलि आफ्नै रंग देखाउन सक्छन् । त्यसले उहाँको व्यक्तित्व अनुसारको भूमिका निर्वाह गर्न बाधा श्रृजना गर्नसक्छ ।”  

तर, पनि उनी अहिले निर्वाचितले तत्कालका लागि बार बेन्च विवादलाई बारले उठाएकै मुद्दा स्थापित गर्दै समाधान गर्ने विश्वास गर्छन् ।