फुटेको सिसाका टुक्रामा पनि 
आफ्नै अनुहार खोज्छ मानिस 
छुटेको दिशाका गोरेटामा पनि 
आफ्नै पदचिह्न खोज्छ मानिस 
 
जग्गाको सबै आना आनामा 
आफ्नो स्वामित्व खोज्छ मानिस 
लालपुर्जाका सबै पाना पानामा 
आफ्नै औँठाछाप खोज्छ मानिस
 
अन्नका प्रत्येक माना मानामा 
आफ्नै भकारी खोज्छ मानिस 
खानाको स–साना दाना दानामा
आफ्नै स्वाद खोज्छ मानिस 
 
प्रेमीका आँखाका नानीमा
आफ्नै अभाव खोज्छ मानिस 
बैरीका मन–मस्तिष्कमा पनि
आफ्नै प्रभाव खोज्छ मानिस 

यत्रतत्र सर्वत्र र मृत्युशय्या पनि 
आफैँलाई मात्र रोज्छ मानिस ।