काठमाडौं । ललितपुरस्थित लेलेको अमरकान्ति माध्यमिक विद्यालय, बाँडेगाउँको बुद्ध मावि र चापागाउँको सांग्रिला इन्टरनेसनल स्कुल दोस्रो संस्करणको गोदावरी नगरपालिका स्तरीय अन्तर विद्यालय सेभेन ए साइड फुटबल प्रतियोगिताको क्वार्टरफाइनलमा प्रवेश गरेका छन् ।  

ढोलाहिटीस्थित विनायक स्पोर्टस कम्प्लेक्समा मंगलबारबाट सुरु प्रतियोगितामा समूह सीबाट दुई खेल जित्दै अमरकान्तिले अन्तिम आठमा स्थान बनाएको हो ।

अमरकान्तिले बज्र एकेडेमीलाई २–० ले तथा बालअंकुरलाई २–१ ले पाखा लगाएको छ । यो समूहको बज्र एकेडेमी दुवै खेल हार्दै प्रतियोगिताबाट बाहिरिएको छ । मंगलबारको अन्तिम खेलमा रिदभान स्कुल र बालअंकुर माविले २–२ गोलको बराबरी खेल्दै क्वार्टरफाइनलको सम्भावना दुवैले कायमै राखेका छन् ।

समूह डी बाट बुद्ध मावि बाँडेगाउँले गंगाजमुना स्कुल लेलेलाई १–० ले तथा भीमसेन स्कुल देवीचौरलाई २–१ ले हराएको छ । बुद्ध मावि गत संस्करणको विजेता टोली हो ।

यो समूहबाट लिटिल स्टार लगातार दुई खेल हार्दै प्रतियोगिताबाट बाहिरिएको छ भने भीमसेन र गंगाजमुनामध्ये एउटा स्कुल अर्को चरणमा पुग्नेछन् ।

पाँच वटा विद्यालय रहेको समूह बी बाट सांग्रिला स्कुलले लगातार दुई खेल जित्दै अन्तिम आठमा पुगेको छ ।

सांग्रिलाले टीकाभैरवको बुद्ध माविलाई ४–१ ले तथा लेलेको सरस्वती माविलाई ३–० ले हराएको छ । सांग्रिलाका सविन चेपाङले प्रतियोगितामा चार गोल गरिसकेका छन् ।

यो समूहमा वरिष्ठ माविले नेवा स्कुललाई २–१ ले हराउँदा बुद्ध माविले वरिष्ठलाई हराएको छ । यसैगरी नेवा स्कुल र सरस्वती स्कुलले ३–३ खेलको बराबरी खेलेका छन् ।

समूह ए बाट एभेरेष्ट इंगलिस स्कुलले पनि क्वार्टरफाइनलमा स्थान बनाएको छ । एभरेष्टले इन्द्रेणी स्कुल र सूर्य शिक्षा सदनलाई हराएको हो । इन्द्रेणीले भने टीकाभैरव बोर्डिङ स्कुलसँग बराबरी खेल्दा टीकाभैरबले सूर्य शिक्षालाई १–० ले निराश पारिदिएको छ । दुवै खेल हार्दै सूर्य शिक्षा सदन प्रतियोगिताबाट बाहिरिएको छ । इन्द्रेणी र टीकाभैरवमध्ये एक स्कुलको अर्को चरणमा जाने सम्भावना कायमै छ ।

नगरपालिकाभित्रका १७ वटा विद्यालयको सहभागिता छ । लिग कम नकआउट प्रतिस्पर्धामा हरेक समूहका शीर्ष दुई टोली क्वार्टरफाइनलमा प्रवेश गर्ने ज्ञानकुण्ड युवा क्लबका कार्यवाहक अध्यक्ष एवं प्रतियोगिता संयोजक निकेश श्रेष्ठले बताए ।

उनका अनुसार बुधबार समूह चरणका बाँकी खेल र क्वार्टरफाइनलका खेलहरू हुनेछन् । प्रतियोगिताको विजेताले नगद ५० हजारसहित ट्रफी, मेडल र प्रमाणपत्र प्राप्त गर्दा उपविजेताले २५ हजारसहित ट्रफी, मेडल र प्रमाणपत्र पाउने छ ।

यस्तै, विधागततर्फ उत्कृष्ट खेलाडी, गोलरक्षक, गोलकर्ता, र उदयीमान खेलाडीले जनही पाँच हजार पाउने छन् ।

प्रतियोगिताको उद्घाटनका बेला उत्कृष्ट मार्चपास गर्ने टोलीलाई पनि ट्रफी, मेडल र प्रमाणपत्रका साथै नगद पाँच हजार पुरस्कार प्रदान गरिने प्रतियोगिता संयोजक श्रेष्ठले बताए ।