काठमाडौं । नेपाल दूरसञ्चार प्राधिकरणका तत्कालीन अध्यक्ष दिगम्बर झाविरुद्धको भ्रष्टाचार मुद्दामा अन्तिम सुनुवाइ हुँदै छ । मोबाइल डिभाइस म्यानेजमेन्ट सिस्टम (एमडीएमएस) परामर्श सेवा खरिदमा अनियमितता भएको भन्दै उनीसहित १९ जनाविरुद्ध अख्तियार दुरुपयोग अनुसन्धान आयोगले ०८० साल चैत १५ गते मुद्दा दायर गरेको थियो ।

उक्त मुद्दामा सोमबार (माघ २१) देखि विशेष अदालतका न्यायाधीशहरू अध्यक्ष टेकनारायण कुँवर तथा सदस्यहरू रितेन्द्र थापा र विदुरु कोइरालाको इजलासमा सुनुवाइ सुरु भएको हो । आयोगले झासहितले एमडीएमस परामर्श सेवा खरिदमा सार्वजनिक खरिद ऐन र कार्यविधिले तोकेका प्रक्रिया पूरा नगरेको न्युमेरा जेभीसँग भएका सम्झौताका कागजात लुकाएको आरोपमा ९१ करोड ९८ लाख ३० हजार रुपैयाँ बिगो कायम गरी मुद्दा दायर गरेको थियो ।

आयोगले एमडीएमस खरिदमा खर्च भइसकेको २३ करोड २० लाख ६९ हजार अभियुक्तहरूबाट असुलउपरको पनि मागदाबी गरेको छ ।

आयोगले झा र पुरुषोत्तम खनालले खरिद प्रक्रियामा दूरुसञ्चार प्राधिकरणको प्राविधिक मूल्यांकन प्रतिवेदन, प्रतिवेदनउपरको निर्णय, आर्थिक प्रस्ताव खोल्ने निर्णय, मुचुल्कामार्फत पेस गरिएको आर्थिक प्रस्तावहितका कागजात समेत गायब पारेकाले उनीहरूलाई थप सजाय पनि मागदाबी गरिएको छ ।