काठमाडौं । सभामुख देवराज घिमिरेसँग इजरायली राजदूत श्मुलिक आरी बासले शिष्टाचार भेट गरेका छन् । आइतबार भएको भेटमा हमासको नियन्त्रणमा रहेको भनिएका नेपाली विद्यार्थी विपीन जोशीको रिहाइको विषयमा भइरहेका प्रगतिका विषयमा सभामुख घिमिरेले जिज्ञासा राखेको सभामुखको सचिवालयले जनाएको छ ।

भेटका क्रममा दुई देशबीचको दुइपक्षीय हित, सहयोग, सहकार्य र संसदीय अनुभव आदान प्रदानसहितका विषयमा कुराकानी भएको थियो । सभामुख घिमिरेले नेपालका लागि इजरायली नयाँ राजदूतको कार्यकालमा नेपाल–इजरायल सम्बन्ध थप मजबुत हुने विश्वास व्यक्त गरेका छन् । घिमिरेले विपीनको रिहाइ प्राथमिकतामा राख्न राजदूतमार्फत इजरायल सरकारको ध्यानाकर्षण गरेका छन् ।

राजदूत श्मुलिकले नेपाली युवा विपीनलाई सकुशल छुटाएर नेपाल फर्काउन इजरायलले प्रयास गरिरहेको भन्दै उनले रिहाइका लागि नेपालले अन्तर्राष्ट्रिय समुदायको समेत सहयोग लिनुपर्ने बताएका छन् ।