काठमाडौं । बागलुङ नारायणस्थानकी भीमादेवी सुवेदी २७ वर्षदेखि भने पार्वती आचार्यको नामबाट परिचित छन् । पर्वत फलेवास नगरपालिका–२ का युवासित विवाह गरेपछि सुवेदीले थर मात्रै होइन, नामसमेत फेरिन् । 

पार्वती हाल ६३ वर्ष पुगेकी छिन् । विवाह गरेपछि महिलाको थर फेरिनु त सामान्य भइहाल्यो । तर, भीमादेवीले थरसँगै नाम पनि फेरेर नागरिकता लिइन् । उनले नाम नै फेर्नुको रहस्य भने अर्कै छ । 

२७ वर्षअघि गरेको अपराध लुकाउन उनले थरसँगै नाम पनि परिवर्तन गरेकी हुन् । तर, उनको त्यो चलाखी कालान्तरसम्म भने लुक्न सकेन । २७ वर्षअघि गरेको अपराधको सजाय काट्न उनी ६३ वर्षको उमेरमा पक्राउ परेकी छिन् ।

जीवनको उत्तरार्द्धको १९ वर्ष ११ महिना ११ दिन उनले जेल जीवन गुजार्नुपर्ने भएको छ । पर्वत प्रहरीको टोलीले विशेष सूचनाका आधारमा आचार्यलाई पक्राउ गरेर फैसला कार्यान्वयनका लागि जिल्ला अदालत पर्वत उपस्थित गराएको थियो ।

पर्वत जिल्ला अदालतले फैसला कार्यान्यवनका लागि शुक्रबार उनलाई कारागार चलान गरेको छ ।

के थियो अपराध ?

भीमादेवी पर्वतमा विवाह गरेर पार्वती आचार्य हुनुअघि अर्कै युवाको प्रेम सम्बन्धमा थिइन् । उनीहरूबीच प्रेम झांगिएकै अवस्थामा थियो । त्यहीबीचमा उनको अर्कै युवासित विवाह भयो ।

तर, प्रेमीसितको शारीरिक सम्बन्धबाट उनी गर्भवती भइसकेकी थिइन् । बच्चा जन्माउने अवस्थामा नै पुगेकी उनलाई अवैध सम्बन्धबाट जन्मिएको शिशुबारे श्रीमान्‌ले  थाहा पाएमा घरबार बिग्रिने चिन्ता थियो । त्यही चिन्ताका कारण पार्वतीले शिशु जन्मिनासाथ हत्या गर्ने योजना बुनिन् । 

सोही योजनाअनुसार उनले नवजात शिशुको हत्या गरी जंगलमा बेवारिसे अवस्थामा फालिन् । प्रहरीको अनुसन्धानले शिशुको हत्यामा पार्वतीको संलग्नता खुलायो । तर, उनी पर्वतबाट समेत बसाइँ सरेर रुपन्देहीको कञ्चन गाउँपालिका–१ लौसा बसाइँ सरिसकेकी थिइन् । 

घटनाको २७ वर्षपछि पर्वत प्रहरीको टोलीले विशेष सूचनाका आधारमा उनलाई पक्राउ गर्न सफल भएको जिल्ला प्रहरी कार्यालय पर्वत प्रहरी प्रमुख प्रहरी नायव उपरीक्षक (डीएसपी) रविन विष्टले जानकारी दिए । 

पर्वत प्रहरीका प्रहरी निरीक्षक (इन्स्पेक्टर) सुमित श्रेष्ठले विशेष सूचना र प्रहरीको निरन्तरको प्रयासले आचार्यलाई पक्राउ गर्न सफल भएको उनले बताए ।

‘‘अपराध गरेर भाग्नेहरू कुनै पनि समय कानुनी दायरामा आउनुपर्छ भन्ने उदाहरण पनि हो यो । हामीले घटनाको २७ वर्षपछि उनलाई पक्राउ गर्न सफल भएका हौँ,’ इन्स्पेक्टर श्रेष्ठले भने ।

पार्वतीले नाम र थर सबै परिवर्तन गरेका कारण सनाखत गर्न समेत प्रहरीलाई समय लागेको उनको भनाइ छ ।

पार्वतीलाई नवजात शिशुको हत्या अभियोगमा जिल्ला अदालत पर्वतले ०५४ जेठ २० मा १९ वर्ष ११ महिना ११ दिन कैद सजाय हुने फैसला गरेको थियो ।