site stats
बाह्रखरी :: Baahrakhari
अर्थ व्यवसाय
Global Ime bankGlobal Ime bank
यसकारण राष्ट्रिय परिचयपत्र अनिवार्य, कागजी झन्झट हट्ला ?

काठमाडौं । बैंक तथा वित्तीय संस्थाले ग्राहकको विवरणका निम्ति राष्टिय परिचयपत्रको प्रयोग गर्न थालेका छन् । केही दिनअघि नेपाल राष्ट्र बैंकले बैंक तथा वित्तीय संस्थालाई राष्ट्रिय परिचयपत्रको प्रयोग गर्न निर्देशन दिएको थियो ।

सरकारको निर्णयानुसार गएको असार १० गते राजपत्रमा प्रकाशित सूचनाबाट विभिन्न सार्वजनिक सेवामा राष्ट्रिय परिचयपत्रको प्रयोग अनिवार्य गरिएको थियो । सोहीअनुसार बैंक तथा वित्तीय संस्थालाई राष्ट्रिय परिचयपत्र (एनआईडी)को प्रयोग गर्न निर्देशन दिइएको राष्ट्र बैंकका प्रवक्ता रामु पौडेलले बताए ।

“अब एनआईडीको नम्बर दिएर बैंकिङ प्रक्रिया गर्न मिल्ने हुन्छ । बैंक तथा वित्तीय संस्थाले नम्बरका आधारमा नागरिकको विवरण थाहा पाउन सक्छन् । यसो हुँदा धेरै कागजात बोक्नुपर्ने स्थिति रहन्न,” प्रवक्ता पौडेलले भने ।

यसका निम्ति राष्ट्र बैंक, राष्ट्रिय परिचयपत्र तथा पञ्जीकरण विभाग र क्रेडिट इन्फरमेसन ब्युरो (कर्जा सूचना केन्द्र लिमिटेड)बीच समन्वय गरेर काम भइरहेको उनले जानकारी दिए ।

“राष्ट्रिय परिचयपत्रको नम्बरका आधारमा खाता खोल्ने, अनलाइनबाट विभिन्न सेवा लिन सक्नेलगायत कामहरू गर्न सकिन्छ । भविष्यमा व्यक्तिको क्रेडिट स्कोरिङ पनि यसबाट हेर्न मिल्ने बनाउन सकिन्छ,” उनले भने ।

राष्ट्रिय परिचयपत्र नम्बरका आधारमा उपलब्ध विवरण वास्तविक भए÷नभएको यकिन गर्न राष्ट्र बैंकको योजनाअनुसारको सेन्ट्रल केवाईसीको कार्य कर्जा सूचना केन्द्रले थालेको छ ।

सीकेवाईसी प्रणाली एनआईडीको सम्पूर्ण विवरण रहेको परिचयपत्र विभागको प्रणालीसँग आबद्ध वा इन्टिग्रेसन गरिएको छ । यसरी कुनै व्यक्तिले खाता खोल्न वा अरू कामका निम्ति उपलब्ध गराएको एनआईडी नम्बर बैंक तथा वित्तीय संस्थाले सीकेवाईसीमा राख्छन् । त्यसपछि सीकेवाईसीले ‘अटोमेटिक’ रूपमा उक्त विवरण एनआईडीको प्रणालीमा भए÷नभएको यकिन गर्छ ।

कर्जा सूचना केन्द्रका प्रवक्ता विजय कुँवरले यही माघ १ गतेदेखि नै सीकेवाईसी सञ्चालनमा ल्याइसकेको बताए । “राष्ट्र बैंकको परिकल्पनाको सीकेवाईसी विभिन्न उद्देश्यसहितको ठूलो प्रणाली हो । अहिले हामीले सुरुआती चरणमा एनआईडीको विवरण भेरिफाइन गर्न सक्ने बनाएर बैंक तथा वित्तीय संस्थालाई प्रयोग गर्न मिल्ने बनाइसकेका छौँ,” केन्द्रका प्रवक्ता कुँवरले भने ।

सीकेवाईसी नै प्रयोग गरेर बैंक तथा वित्तीय संस्थाले एनआईडीका आधारमा सेवा उपलब्ध गराउन थालेको उनले बताए । केन्द्रले करिब तीन वर्षअघिदेखि क्रेडिट रेटिङको काम गर्दै आएको उनले जानकारी दिए ।

क्रेडिट रेटिङले बैंक तथा वित्तीय संस्थाबाट लिएको ऋण कुन व्यक्तिले कसरी तिरिरहेको भन्ने जानकारी दिन्छ । यसका आधारमा व्यक्तिलाई थप ऋण उपलब्ध गराउने/नगराउने निर्णय वित्तीय संस्थाले गर्न सक्छन् ।

राष्ट्रिय परिचयपत्रले कुनै पनि व्यक्तिको बायोमेट्रिक अथवा औँला र आँखासहितको विवरण राख्ने हुँदा वास्तविक व्यक्ति पहिचान हुन्छ । यसो हुँदा कुनै सेवा लिन जाने बेला उक्त व्यक्ति स्वयं हो/होइन भनेर बायोमेट्रिक विवरणबाट प्रमाणित हुन्छ ।

“एनआईडीले वास्तविक व्यक्ति पहिचान गर्ने हो । १५/२० वर्ष पुरानो नागरिकता लगेर जाने मान्छे त्यो हो वा हैन भन्ने शंका गर्ने ठाउँ रहन्छ । तर, राष्ट्रिय परिचयपत्रबाट वास्तविक मान्छे भएको/नभएको पुष्टि हुन्छ,” राष्ट्रिय परिचयपत्र तथा पञ्जीकरण विभागका निर्देशक शिवराज सेढाइँले भने । अर्काको नागरिकता प्रयोग गरेर हुने गरेका ठूला ठगीका घटना यसबाट कम र रोकिने उनको भनाइ छ ।

दोहोरो वा अरू व्यक्तिको सामाजिक सुरक्षाबापतको रकम लिनेजस्ता गतिविधि पनि एनआईडीको प्रयोगले रोकिने विभागका सूचना अधिकारी सेढाइँले बताए ।

एनआईडीको प्रयोग गरी भत्ता वितरण गर्दा वास्तविक तथ्यांक समेटिएको र यसले करिब चार अर्ब रुपैयाँ बचत भएको विभागले जनाएको छ । गएको असारमै राजपत्रमा प्रकाशित सूचनामा सामाजिक सुरक्षा, निवृत्तिभरणसम्बन्धी सेवा र व्यक्तिगत आयकर दर्ताका निम्ति राष्ट्रिय परिचयपत्र अनिर्वाय गरिएको थियो ।

यस्तै, सवारीचालक अनुमति, कम्पनी दर्ता तथा नवीकरण, बैंकिङ तथा वित्तीय सेवा, टेलिफोन तथा सिमकार्ड, सामाजिक सुरक्षा कोष र घरजग्गा किनबेचमा पनि नागरिकताको ठाउँमा राष्ट्रिय परिचयपत्र प्रयोग गर्नुपर्ने व्यवस्था गरिएको छ । यीसहित व्यक्तिगत विवरण चाहिने सेवामा क्रमिक रूपमा एनआईडीको प्रयोग गरिँदै जाने विभागले जनाएको छ ।
 

प्रकाशित मिति: सोमबार, माघ १४, २०८१  ०८:५७
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
Shivam Cement DetailShivam Cement Detail
सम्पादकीय
Hamro patroHamro patro