काठमाडौं । ललितपुर महानगरपालिकाले आफ्नो नगरभित्र रहेका नेपाली फुटबल लिगको विभिन्न डिभिजन खेल्ने १२ क्लबलाई सम्मान गरेको छ ।

ललितपुरमा आइतबार एक कार्यक्रम आयोजना गर्दै महानगरपालिकाले क्लबलाई नगदसहित सम्मान गर्दै प्रतियोगिता जितेबापत थप पुरस्कारबाट प्रोत्साहन गरेको हो । उनीहरूलाई ललितपुर महानगरपालिकाका मेयर चिरिबाबु महर्जन र एन्फाका महासचिव किरण राई लगायतले पुरस्कार रकमको चेक हस्तान्तरण गरेका थिए । ललितपुरले शीर्ष डिभिजनका पाँच क्लब थ्री स्टार, प्रेन्ड्स, जावलाखेल युथ, चर्च ब्वाइज र सातदोबाटो युथ क्लबलाई समान चार लाख रुपैयाँ प्रदान गरेको हो ।

विभिन्न प्रतियोगिता जितेबापत पनि समान चार लाखका दरले चर्च ब्वाइज र ‘बी’ डिभिजन क्लब ब्रिगेड ब्वाइज युनाइटेडले थप पुरस्कार पनि पाए । चर्च ब्वाइजले पाँच नकआउट र ब्रिगेडले दुई प्रतियोगिता जितेको थियो । चर्च ब्वाइजले कुल २० लाख र ब्रिगेड ब्वाइजले कुल आठ लाख रुपैयाँ पुरस्कार पाए । बिग्रेडसँगै ‘बी’ डिभिजनका अन्य दुई क्लब च्यासल र खुमलटार एफसीले पनि समान तीन लाख रुपैयाँ पाएका हुन् । ललितपुर महानगरले ‘सी’ क्लबलाई भने समान दुई लाख प्रदान गरेको थियो । ललितपुरमा रहेका ‘सी’ डिभिजन क्लबका खालीबारी, पुलचोक स्पोर्ट्स, झम्सीखेल युथ र सानेपा क्लबलाई पनि सम्मान गरिएको थियो ।

ललितपुर महानगरपालिका मेयर महर्जनले ‘बी’ डिभिजनबाट शीर्ष डिभिजनमा पुग्ने क्लबलाई २० लाख रुपैयाँ दिने बताए । उनले लिग नहुने हो भन्दै एन्फालाई प्रश्न गर्दै खेलाडी पलायन हुने उल्लेख गरे । लिग नहुँदा फुटबलको स्तर घट्ने उल्लेख गर्दै मेयर महर्जनले एन्फालाई लिग आयोजना गर्न अनुरोध गरे । आगामी वर्ष ‘ए’ डिभिजन क्लबमा खेल्ने ललितपुरका एक खेलाडीलाई मासिक रूपमा तलबको व्यवस्था गर्ने बताए ।

एन्फाका महासचिव किरण राईले संघीय सरकारले मात्र लगानी गरेर खेलकुद र खेलाडीको स्तर विकास सम्भव नहुने उल्लेख गर्दै स्थानीय सरकारको भूमिका पनि महत्त्वपूर्ण रहने उल्लेख गरे ।