काठमाडौं । नेपाली कथानक चलचित्र ‘मिसिङ : केटी हराएको सूचना’ले दर्शकको उत्साहप्रद साथ पाउन सकेको छैन । प्रदर्शनको चौथो दिनमा आइपुग्दा पनि चलचित्रले दर्शकको साथ पाउन नसकेको हो ।

राम्रो हाइप बनाउन नसके पनि 'वर्ड अफ माउथ' राम्रो हुने र त्यसको बलमा चलचित्रले राम्रो व्यापार गर्ने अपेक्षा निर्माण पक्षको थियो । तर, 'वर्ड अफ माउथ'को बलमा पनि चार दिनसम्म आइपुग्दा चलचित्र हेर्न हलमा दर्शकको उत्साह देखिएको छैन ।

दीपेन्द्र गौचनको लेखन तथा निर्देशन रहेको चलचित्रमा नाजिर हुसेन र सृष्टि श्रेष्ठ मुख्य भूमिकामा छन् । यस चलचित्रलाई क्यूएफएक्सलगायत मल्टिप्लेक्सलाई उच्च संख्यामा शो उपलब्ध गराए पनि त्यसको अनुपातमा दर्शक हल पुगेनन् । 

लबिम मलको सिनेमा हलमा आज साँझ ६:४५ बजेको शोमा बिहान ११:२० बजेसम्म चारवटा टिकट बिक्री भएका छन् । ३:१५ को शोमा १९ वटा टिकट बिक्री हुँदा १२:३० शोमा एउटा टिकट पनि बिक्री भएको छैन । 

सिभिल मलको १२ बजेको शोमा पाँचवटा टिकट बिक्री भएको छ । ३:१५ को शोको १३ वटा र ६:४५ बजेको शोको टिकट एउटा पनि बिक्री भएको छैन । 

भाटभटेनीको साढे ११ बजेको शोमा २ र सोही हलमा २:४५ बजेको शोमा एउटा पनि टिकट बिक्री भएको छैन । 

अधिकांश शो खाली छन् । टिकट बिक्री नहुँदा कतिपय शो रद्द हुने अवस्था देखिएको छ ।  

चलचित्रमा सञ्जय गुप्ता, रामनारायण ठाकुर, मदन ठाकुर, रिना रिमाल, कौशल्या ठाकुर, ललितादेवी मिश्र, रूपेश मण्डल, सुदीप पटेल, अनिल कुर्मी, मनोज शाह, अर्जुन पोखरेललगायत कलाकारको अभिनय छ ।

निर्देशक दीपेन्द्र ‘उजेली’ डकु–ड्रामाबाट परिचित छन् । दीपेन्द्रलाई अहिले पनि धेरैले ‘उजेली’ निर्देशक भनेर चिन्छन् ।