काठमाडौं । चलचित्र ‘पूर्ण बहादुरको सारङ्गी’ निर्माण टिममा विवाद देखिएको छ । ‘पूर्ण बहादुरको सारङ्गी’ नेपाली चलचित्र उद्योगमा ऐतिहासिक ग्रसकलेक्सन गरेको छ । यस चलचित्रले नेपालमा मात्र करिब ५० करोड रुपैयाँ ग्रसकलेक्सन गरेको छ ।

ऐतिहासिक सफलता पाएको अवसरमा निर्माता विनोद पौडेलले आइतबार काठमाडौंमा ‘सक्सेस पार्टी’ पनि दिए । ‘सक्सेस पार्टी’मा उनले ‘पूर्ण बहादुरको सारङ्गी–२’ र ‘रोल नं १’ पनि घोषणा गरे । 

तर, ‘पूर्ण बहादुरको सारङ्गी–२’ घोषणाबारे आफूले सञ्चार माध्यम र सामाजिक सञ्जालबाट थाहा पाएको ‘पूर्ण बहादुरको सारङ्गी’का निर्देशक सरोज पौडेलले बताएका छन् । उनले यसको कथा र आइडिया आफ्नो भएको बताएका छन् । 

‘पूर्ण बहादुरको सारङ्गी’लाई 'कमाइ खाने भाँडो' नबनाउन पनि आग्रह गरेका छन् । “पूर्ण बहादुरको सारङ्गी–२ घोषणा भएपछि मैले पनि तपाईंहरूसँगै जानकारी पाएको छु । पूर्ण बहादुरको सारङ्गी विशुद्ध मेरो स्टोरी आइडिया र निर्देशनमा बनेको फिल्म थियो, जसलाई दर्शकले अपार माया साथ दिएर ऐतिहासिक बनाइदिनुभएको छ,” सरोजले फेसबुकमा लेखेका छन्, “इतिहास घरिघरि कोर्न सम्भव हुँदैन । त्यही कारण मैले पूर्ण बहादुरको सारङ्गीले कोरेको इतिहासलाई इतिहास नै बनाइ सम्मानपूर्वक राखौँ । यसलाई कमाइ खाने भाँडो बनाउन खोज्दा आफ्नै हातले बनाएको इतिहास आफ्नै कारण भत्किन सक्छ । मैले यो फिल्म दोस्रो भागमा काम गर्दैन भनिसकेको छु ।” 

सकेसम्म २, ३, ४, ६ बनाउनतिर नलागेर आफ्ना कथा फरक शैलीमा भन्न निर्देशक पौडेलले सुझाएका छन् । उनले आफूलाई बिनाजानकारी आफूले सिर्जना गरेका पात्र र आफ्नो कथालाई तन्काएर व्यापार गर्ने माध्यम नबाउन आग्रह गरेका छन् । 

“पूर्ण बहादुरको सारङ्गी–२, मैले काम नगरे पनि आवश्यक प्रक्रिया पूरा गरेर अगाडि बढाउनुहोला । सारङ्गी–१ ले स्थापित गरेको गरिमा जोगाउनुहोला,” उनले भनेका छन् । 

आइतबार घोषणा गरिएको दुई चलचित्र ‘पूर्ण बहादुरको सारङ्गी–२’ र ‘रोल नं १’ मध्ये ‘पूर्ण बहादुरको सारङ्गी–२’को लेखक तथा निर्देशकको नाम घोषणा गरिएको छैन । ‘रोल नं १’को निर्देशक र लेखकको नाम भने उल्लेख गरिएको छ । निर्मातामा भने विनोद आफ्नै नाम छ । 

‘पूर्ण बहादुरको सारङ्गी’मा निर्मातामा प्याट्रिक सुवेदी र रमेश ढकाल पनि थिए । तर, ‘पूर्ण बहादुरको सारङ्गी–२’ र ‘रोल नं १’मा उनीहरूको नाम छैन । 

निर्माता पौडेलले आइतबार दुई सिनेमा निर्माणको घोषणा गर्दा सेभेन सिज सिनेमाका नयाँ लोगो पनि सार्वजनिक गरेका थिए । कार्यक्रममा प्याट्रिक र रमेश दुवै उपस्थित थिएनन् । यसले पनि यो टिम औपचारिकरूपमा विभाजित भएको देखाउँछ ।