काठमाडौं । चलचित्र ‘मायावी’को तेस्रो गीत ‘सितारा जडेको’ सार्वजनिक भएको छ । गीतमा दीक्षित पौडेल र समीरा थपलियाको स्वर छ । शम्भुजित बास्कोटाको संगीत तथा दयाराम पाण्डे र दीवाकर भट्टराईको शब्दरचना छ ।

गीतले माइतीघरबाट अन्मिएर पराइघर जान लागेकी छोरीको बिदाइको सकसपूर्ण अवस्था देखाउने प्रयास गरेको छ ।

आफूले मन पराएकी युवतीलाई अर्काको हातमा सुम्पिनु पर्दाको बिछोडको पीडालाई पनि गीतले एकसाथ देखाएको छ ।

भिडियोमा चलचित्रका मुख्य कलाकारहरू पल शाह, दीपिका प्रसाई, डेब्यु अभिनेता समीम खान, प्रशान्त ताम्राकार, सुशील सिटौला, करिष्मा श्रेष्ठलगायत छन् ।

फागुन १४ गतेबाट प्रदर्शनमा आउने ‘मायावी’ दीवाकर भट्टराईको लेखन तथा निर्देशनमा निर्माण भएको चलचित्र हो ।

‘मायावी’मा ध्रुव न्यौपाने, राज कटुवाल र चन्द्र पन्तको लगानी छ । प्रवीण भट्टराई र करण सिंह कार्यकारी निर्माता छन् । मञ्जु भण्डारी, राजु पराजुली र सुमित ओली सह–निर्माताको रूपमा रहेका छन् ।

चलचित्रमा शम्भुजित बास्कोटा र एसडी योगीको संगीत छ । राजु विक्रम थापाको डीओपी तथा मिलन श्रेष्ठको सम्पादन छ ।